4月開自駕騷製造就業機會　鄭中基唱開心歌讓樂迷忘憂

更新時間：19:58 2021-03-12 HKT
發佈時間：22:30 2021-03-12 HKT

Ronald盼為久未睇騷及開心過的觀眾帶來歡樂。

本周二（9日）才踏入49歲生日的鄭中基（Ronald），在生日前夕宣布於下月24及25日假中環海濱活動空間，舉行一連兩場全港首個戶外自駕演唱會《Drive In Ultra – WEE are Ronald Cheng》，門票今日（12日）預售，並於本月26日正式開賣。談到生日願望，Ronald望大家身體健康、世界和平、人人有工開，他說：「以前講呢啲好老土，今年的確真係咁！每年生日都想做有意義嘅事，去年開始戴口罩，做關心社會嘅事，今年都有拍啲影片，遲吓大家就會睇到。生日當然想同大家一齊渡過，加上我一向都好想搞戶外演唱會，今次終於搞到啦！」

Ronald承諾唱大家喜愛的歌，並會邀請其他歌手做嘉賓。

Ronald又拍片解答自駕騷的常見問題。

問到疫情下為何仍搞大型演唱會？Ronald解釋：「第一，搞大型啲，就可以多啲人有工開；第二，香港冇試過呢種形式，外國好多地方已經有drive in演唱會，加上呢個形式好適合喺疫情下搞。」並謂曾在外國「drive in」睇戲，他都覺得很有趣，今次能進化到開演唱會，Ronald說：「會幾好玩，又唔會違反限聚令，一家大細可以坐喺車到睇，應該係值得做同幾好玩嘅一件事，所以就應承了主辦單位！期望大家入嚟睇Show嗰幾個鐘頭，先擺低唔開心嘅事，一齊開心、玩咗先，經歷咗年幾時間，每日都估唔到聽日有咩發生，希望喺睇演唱會咁短時間中，帶畀大家久違嘅快樂和Enjoy音樂。」

Ronald表示場內觀眾必須戴上口罩及量體溫等。

演唱會座位表

至於是次個唱的主題概念，Ronald表示一個成功的演唱會，不單止靠歌手，仲要有燈光、導演、搭台、Band和觀眾才搞到一個Show，他說：「所以每個嚟睇演唱會嘅人，其實你哋都係鄭中基。加上疫情下，全世界都好團結抗疫，唔可能一個人做到所有嘢，要大家團結先做到，所以演唱會叫『WEE are Ronald Cheng』，等如人人都係鄭中基。」Ronald又率先透露演唱會內容，他說：「會唱番多啲開心歌，當然大家想聽嘅歌都會有。除咗我之外，到時仲會見到其他歌手，亦有一個主題關於樂壇、新人，仲係排緊，相信大家都會喜歡！」

此外，他亦於個人YouTube Channel「機動電視台RTV」上載短片，解答今次自駕騷的常見問題，例入場內人士須遵守政府公佈之最新預防及控制疫病規例，即是觀眾必須戴上口罩，故場內也不設小食檔，Ronald說：「入場觀眾可以放心，因為我哋可以填表或使用安心出行，同埋會量體溫。」