【頭條獨家】自認入廚冇天份　蔣祖曼拍節目搵老公幫拖

更新時間：22:50 2020-12-08 HKT
發佈時間：18:40 2020-12-08 HKT

Joman跟阿麒14年結婚以來，都是老公下廚為主。

蔣祖曼（Joman）跟導演老公陳卓麒，日前首次以夫妻檔為香港開電視節目《30分鐘大放餸》出任嘉賓，即場大顯廚藝。Joman自爆本身對入廚完全冇天份，平日三餐全靠老公及家傭姐姐搞掂，所以今次節目一定要搵老公幫拖，否則一定出事。講到首次夫妻檔演出，兩人都話幾好玩，唔排除再合作。採訪：杜淑霞

最初Joman都有幫手切菜。

但阿麒睇見唔多滿意攞番嚟切。

最初節目邀請Joman時，已即時想到要搵老公幫手，「我經理人知我唔係好煮到嘢，不如叫埋老公幫手，我問佢（老公）冇應我嘅，我話『你唔去，我死梗㗎喎！』跟住佢話唔係唔嚟，諗吓先啫！」阿麒解釋，「因爲我未做過烹飪節目，平時都喺自己廚房自high玩，怕啲觀眾見到話唔係咁煮㗎喎！（Joman：哈哈！佢諗得太多嘢。）」

Joman坦言：「我係鍾意食，但係唔係咁鍾意煮，煮飯嘅過程我唔係好享受，整甜品我都係為咗食㗎咋！我係連麵豉同豆豉都分唔到嘅程度，頭先仲問點解用碌柚整豬扒，其實嗰啲冰糖嚟，所以我今日係抱住一個獵奇心態。」最終阿麒煮了「麻辣豬肉乾炒飯」、「蒜片牛柳粒意粉」、「麵豉豆卜雞柳炒四季豆」及「糖醋豬扒」。

後尾Joman索性專心同主持霍嘉恩傾偈。

呢碟「蒜片牛柳粒意粉」，真係幾吸引喎！

唔介意再合作

阿麒解釋最初都是焗住學煮餸，「我喺澳洲讀書，掛住香港啲餸咪唯有自己煮，嗰時同屋大鑊飯咁煮下煮下又幾受歡迎，跟住到出埠自己住，咪喺間房整個小廚房，煮得多迷熟能生巧。」在疫情下，阿麒更加多下廚機會，Joman仲爆一對仔女就最開心，「平時佢要開工，個仔唔鍾意我同姐姐（家傭）煮啲餸，所以佢放假最開心，可可（細女）仲會點餸，佢係啲大叔口味，鍾意食鹹蛋蒸肉餅同臘腸嗰啲。」

講到夫妻檔演出，Joman話其實兩人未拍拖時已合作過，「嗰時我得17歲，我哋一齊做fitting model認識嘅，之後佢做幕後就試過一齊拍電影《圍城》，但係幕前今次真係第一次，今次都幾開心嘅，有機會唔介意再合作㗎！」