全球明星中抖音毒碧咸處女抖音片自稱「小貝」賣萌

更新時間：04:11 2020-08-27 HKT
發佈時間：16:07 2020-08-26 HKT

碧咸表示七字呢個數字對佢好重要。

呢期抖音同Tiktok好紅，國家元首提起佢，國際新聞又講起佢，其實抖音面世四年，早已瘋魔全球，最新有萬人迷碧咸都開設了抖音帳號「davidbeckham」，並上載了兩條影片祝內地網友七夕快樂。

其中一段短片中咸爺大晒中文，用普通話向大家問好，又自稱「小貝」，估唔到一向走型男路線的咸爺都可以咁Cute。之後碧咸用英文解釋，「今日係七夕情人節，而七呢個號碼對佢好重要，希望喺呢個特別嘅日子，將我嘅愛分享畀大家，並邀請大家參加我嘅抖音挑戰，Show出你身邊有關7字嘅號碼。」最後雙手更做出韓星至愛嘅畀心心手勢，全片背景音樂係鄧麗君的《甜蜜蜜》，成件事好九唔搭八，但好好笑。

第二段片就見到碧咸喺7號球衣上簽名，而今次背景音樂就係周杰倫的《簡單愛》，最後佢再次用普通話講嘢：「我希望大家今天來抖音被愛包圍。」忍唔住笑咗出聲。

碧咸在7號球衣上簽名，祝網友七夕快樂。

碧咸嫂Victoria好早已經玩抖音，仲同二公子Romeo拍抖音短片拍到跳晒舞。

席捲全球的抖音源於2016年，是一款音樂創意短片平台，是繼Instagram、Facebook及Snapchat後火速冒起的社交平台，憑洗腦的「抖音神曲」與簡單的「抖音挑戰」在網上瘋傳，引起極大迴響，如《學貓叫》及《Count on me》唱到街知巷聞，早前也有不少全球瘋傳的「抖音挑戰」，如去年的「瓶蓋挑戰」及今年的「枕頭挑戰」（pillow challenge）等，因為太多人玩故亦吸引到亞洲明星以至荷里活明星都爭相追捧。

Justin Bieber是超級抖音迷，超豪巨宅內每一忽都見過晒。

NBA球星字母哥(Giannis Antetokounmpo) 同老婆拍嘅搞笑短片亦可以喺抖音睇到。

抖音藉「名人效應」吸引大量用家，亦惹來不少爭議。有傳不少韓星的抖音帳號被封鎖，包括Rain、TWICE及泫雅等，原因不明，令大量韓迷議論紛紛。除咗荷里活明星、韓星、內地紅星和NBA球星都迷上玩抖音外，本港亦有不少藝人係抖音Fans，如陳山聰、林夏薇及何超蓮等，不過抖音已撤出香港市場，冇得下載，就算曾經下載過都玩唔到，咁點解林夏薇仲玩到?點做到㗎?