【尖叫吧】健身教練泄澎湃肌肉照孔劉日做健身三個鐘

更新時間：09:44 2020-08-07 HKT
發佈時間：00:33 2020-08-07 HKT

背肌好雄厚。

有韓國媒體訪問了孔劉的健身教練，該教練服務咗OPPA十幾年，所以兩人亦師亦友，教練仲公開咗兩張OPPA嘅半身肌肉照，好壯好澎湃好想摸。

教練指孔劉完全係健身狂人，幾乎每日都要去Gym Room蒲足3個鐘，如果有劇或戲要拍仲要一日去Gym Room兩次！「我見孔劉嘅時間仲長過見自己阿媽，羡慕吧? 」嘩，好囂張囉。

孔劉喺健身教練眼中係可愛形。

着咗衫嘅孔劉完全睇唔出咁大隻。

教練講孔劉講到停唔到，佢讚孔劉有罕見嘅廣闊膊頭，長腿比例啱啱好，個性又好似一般社區大哥咁爽快。教練笑言:「有一段時間孔劉要做比較嚴格嘅減重，但佢到可以放鬆食嘢嘅cheating day都唔敢鬆懈，突然打畀我，問我食烤肉嘅時候可唔可以飲杯啤酒? 」教練都忍唔住讚孔劉好可愛，最後OPPA有冇飲到啤酒?教練話有飲到500cc嘅啤酒，仲要好慢咁飲。

最後教練話孔劉都鍾意自己下廚，都係唔會太肥嘅蒸同烤，好少加調味料，教練形容為「食得好pure」。