劉少君分享鍛鍊心肺功能貼示　麥德羅為引起恐慌向公眾致歉

更新時間：22:05 2020-08-04 HKT
發佈時間：16:43 2020-08-04 HKT

麥德羅承認大意，不應出院後即出街，並謂：「對唔住所有朋友，我做錯了。」

上月確診新冠肺炎的麥德羅大前日（1日）康復出院，翌日即急不及待相約一同染疫、早一日（7月31日）出院的劉少君去酒樓飲茶，結果惹網民砲轟自私兼四圍「播毒」！對此，兩人日前作出澄清，指醫生重複檢驗多次，證實康復才獲批准出院，又解釋雙方均有抗體在身，絕對排除感染其他人！不過似乎都未能平息網民的怒氣，繼昨日劉少君再拍片重申，並向受到滋擾人士講唔好意思後，今日輪到麥德羅拍片向公眾道歉。

劉少君示範吸波，向大家分享鍛鍊心肺功能的小貼士。

劉少君又指醫生也有介紹吹氣球，令康復者嘅肺部柔軟。

片段一開頭，戴上口罩的麥德羅長嘆一口氣，然後收起手上的報紙再接着說：「先同所有網民、讀者講聲對唔住，因為今日睇到報紙都好唔開心，昨日（2日）朝早應約劉少君，喺屋企樓下附近飲茶，出嚟分享吓我哋好番嘅喜悅，同埋分享吓醫院住嘅衛生，我哋喺醫院係4個人一間房，瞓覺嘅時候都要戴住口罩，原來唔戴口罩瞓覺係好危險。但係，出嚟飲茶係唔啱嘅，係一個大意，咁先同大家講聲對唔住，亦多謝呢兩個禮拜所有照顧我嘅醫護人員，同埋向家人講聲對唔住，令佢哋受到影響，仲有公司一直照顧我，我都希望提醒大家就算確診好番都唔好約朋友飲茶，盡量留喺屋企，呢兩個禮拜調理吓身體、煮吓飯食，總之就唔好去應酬，不必要嘅約會都係。我喺度祝福所有朋友都注意衛生、身體健康，對唔住所有朋友，我做錯了。」

麥德羅出院翌日（2日）即約劉少君去酒樓飲茶。

此外，劉少君又拍短片分享鍛鍊心肺功能的小貼士，他說：「我而家算係康復者，俾大家柔軟鍛鍊肺功能嘅小貼士，醫院俾呢個吸氣令波波提升嘅工具，可以將肺部慢慢提氣，若三個波升起就係正常人，唔得就要慢慢鍛鍊，每次做五至十次，將肺功能慢慢鍛鍊番好。如果冇呢個工具，醫生介紹吹氣球，唔好谷慢慢吹，每日吹三至五個氣球，令康復者嘅肺部柔軟，循序漸進慢慢好番，係小意見，大家可以參考吓。」