【多災多難】廁所玻璃幕門忽然自爆　孫慧雪揭屋企疑有「古怪嘢」

更新時間：13:48 2020-06-15 HKT
發佈時間：11:00 2020-06-15 HKT

阿雪指家中廁所的玻璃幕門忽然自爆，搞到成地玻璃碎。

「古」有「大文豪」周柏豪打碎玻璃杯晒潮文，今有索人妻孫慧雪（阿雪）爆廁所玻璃門，但她卻未有如前者般撰寫感性短文，或用15分鐘去欣賞碎玻璃的美態，只係貼出滿地玻璃碎的照片，並留言：「多災多難⋯⋯繼上次客廁熱水爐爆水、然後到主廁爆水，兩次都爆到瀑布咁，今次最金，因為今次係玻璃瀑布，成個玻璃幕門爆咗，姐姐成手血，我哋成腳血」又Hashtag「希望明天會更好」、「早抖」，一眾網民睇見都好擔心，好在阿雪表示無人受嚴重嘅傷，大家只係踩到啲玻璃粉，兩歲囝囝Riley亦無事，仲話決定換走晒啲玻璃，轉用膠門。

阿雪圖文不符，於IG貼出「牀照」報告爆玻璃事件。

而對於有網民問她有冇拜四角，阿雪就忽然自爆原來屋企疑似有「古怪嘢」，她回覆：「其實我係基督徒，不過之前工人姐姐成日話見到嘢，屋企人為求安心，幫我搵咗位師傅上嚟睇，嗰位師傅話我廁所有啲嘢，哈哈，然後已經裝咗長明燈。」另邊廂，阿雪又喺IG發文報告爆玻璃件事，不過就比Facebook個Po多咗張「牀照」，有網民問她：「圖一？係咪發錯？」阿雪解釋：「其實係唔想個IG面係爆玻璃張相。」