【頭條獨家】疫情前閃遊日本談善言冇靚景靠食叉電

更新時間：21:09 2020-04-05 HKT
發佈時間：22:01 2020-04-05 HKT

放鬆其中一個好方法，當然唔少得食啦！

談善言早前趁住到沖繩拍攝以空手道做主題的ViuTV新劇《打天下》，順道去了4日青森及東京旅遊，由於當時新冠肺炎未擴散，所以行程未有受疫情影響，本來她一心去奧入瀨溪流睇靚景，不過因當地天氣太大雪周圍結了厚冰，未能達成心願狂影靚相，唯有當成拍劇後休息叉電之旅，飲飲食食放縱一下。採訪：杜淑霞

阿談又去了介紹「青森睡魔祭」歷史與魅力的「睡魔博物館」參觀。

住在奧入瀨溪流附近民宿的阿談，難得見到咁大雪都變成大細路瞓喺雪度玩。

阿談在《打天下》中演空手道高手，但現實中她從未接觸過，所以早在開拍前3個幾月，她已跟該劇監製兼男主角歐錦棠苦練，「雖然真係好辛苦，因為本身完全唔識空手道，用幾個月速成，但見到拍出嚟打得好靚，自己都好開心。」所以去到沖繩差不多完成拍攝時，阿談都忍唔住爆喊，「嗰日去海邊拍我坐喺度諗嘢，好感動咁喊，但聽住啲海浪聲，cut咗機我做番自己都繼續喊咗10幾分鐘，入行咁耐都未試過咁樣，可能前後用咗半年時間喺個角色度，順利完成咗特別感動。」

冇靚景影，好彩仲有好多地方玩，阿談就到了青森縣立美術館，當中奈良美智的「aomori犬」為該館象徵性裝置藝術品。

天宫不造美
由於拍得辛苦，阿談即準備假期慰勞一下自己，完成沖繩拍攝即去到青森旅行，但可惜天宫不造美，「我本嚟同朋友諗住去奧入瀨溪流影風景相，嗰度出名四季都有唔同景色，但因為落好大雪，周圍啲雪太厚，變咗啲景得啲雪好單一，冇乜變化，所以都有啲失望，或者下次再去過啦！」雖然冇靚景影相，阿談此行絕對休息夠叉足電，「拍劇嗰排都要節食，呢幾日終於可以放縱吓，加上日本啲嘢真係好好食，所以真係食咗好多嘢，同埋好放鬆，絕對係叉到電，可以返嚟再繼續努力工作。」阿談亦慶幸早出發，因疫情關係，相信短期內都唔會有機會去外地旅遊。