《作家的謊言》獲邀做芝加哥影展閉幕片張建聲：係受寵若驚

更新時間：22:02 2019-06-29 HKT
發佈時間：22:00 2019-06-29 HKT

《作家的謊言》獲邀成為芝加哥影展閉幕電影。

由張建聲監製兼主演電影《作家的謊言：筆忠誘罪》，近日獲邀成為美國芝加哥「亞洲躍動電影展」( ASIAN POP-UP CINEMA ) 第九季閉幕電影，張建聲及導演兼監製孫立基，會在10月一同赴美出席影展。

該影展於上一季揀選黃秋生主演的《淪落人》播映，今次《作家》能成為閉幕片，令團隊甚為鼓舞。張建聲說：「係受寵若驚，呢個電影節喺 Facebook 聯絡我，我嘅戲係從來未曾參加過外國影展，所以當收到呢個訊息時，我有啲懷疑，就搵咗公司同事了解，原來真喎。多謝自己嘅團隊好大付出，所有嘢都係感恩。」

《作家》是百分百的本土製作，能打着港產旗號走向國際，張建聲坦言：「喺呢個時候呢個環境下，一切都得來不易，好似我一有時間就去謝票一樣，我相信試咗可能唔得，唔試就一定唔得，希望將我哋港產片繼續發揚光大甚至乎衝出亞洲去到美國咁遠。呢套戲係我3年嘅心血，亦係我哋上上下下團隊結晶品，希望票房令投資方滿意嘅話開續集。」