【梨港緊乜呀？】《深宮計》劉心悠可愛廣東話遭惡搞交差變膠猜

更新時間：12:57 2018-06-03 HKT
發佈時間：10:23 2018-06-03 HKT

心悠BB嘅浴照，好多人都話佢正。

無綫劇集《宮心計2深宮計》播放以來一直爆紅，雖然都有負評話押韻太多，不過劇集正評都係大多數，早前麥玲玲的古裝look就好有話題！至於另一焦點，就係首次挑戰廣東話古裝劇主角心悠BB，雖然廣東話講唔正，但憑住靚樣擄獲唔少觀眾同網民歡心，最近網上仲熱傳一條剪輯影片，惡接心悠BB嘅對白，大批網民大笑「唔知佢講乜」，不過都讚「佢講得好得意呀雖然真係聽唔明」。

心悠BB係《深宮計》成功彈出，網民幾乎對佢都一致好評，「JC後製」上載了一條「劉心悠廣東話誠實字幕版」影片，配上字幕都唔知心悠BB講乜，不過好多觀眾都憐香惜玉，紛紛留言「佢盡左力」、「好靚女，成套劇至靚❤️」、「佢好叻, 廣東話要講得正, 係好困難的, 像我地講廣東話同英文都好難講得標準.」、「其實我覺得好得意」、「ok喇！你如果唔係講開煲冬瓜，一樣笑料百出」、「其實最鍾意係「膠搓」..配埋佢嗰刻嘅身體語言...應該係一種新嘅枚」、「見到佢咁靚，其實佢講乜嘢都無所謂啦」。

大家都話唔介意佢廣東話唔正，仲話佢好得意。

不過到底條片嘅真實內容講乜？有觀眾就做心悠BB對白人肉翻譯機，「凍撻可以再搭」原來係講緊「檔攤可以再搭」，#%就話呃你十連百連」係「媒人婆就話呃你十年百年」。其餘到底講緊乜？各位要自行參透。

心悠BB其實好努力，係拍之前劉心悠已經話，首次為無線拍劇而且古裝劇心情好複雜，緊張又興奮，由於係廣東話劇集，希望觀眾能明白她所講的每個字，同劇有好多資深演員，她就話「他們講對白出來都好順口，但怕自己講得好哽耳，希望觀眾睇完唔好有太多問號，可能自己睇睇下會唔見咗人會逃走。」