陳奕迅拍戲「失寵」淚灑片場︰可能年紀大會感性一點

更新時間：22:06 2018-01-16 HKT
發佈時間：08:06 2018-01-16 HKT

Eason笑言可能年紀大會感性一點。

由谷德昭執導電影《卧底巨星》舉行香港首映禮，主演的陳奕迅（Eason）、Chris Collins及劉浩龍等出席外，林家棟有份到場支持。對於戲中不少動作戲，Eason坦言要用真力，但要懂得收放，亦明白做動作演員好攰，更認為打人好浪費力會寧願做被人打，而且節奏感好重要。提到拍攝該片時搞到喊，Eason笑言自己當時扭計，由於到內地參與節目《中國新歌星》，所以向劇組申請兩星期，但返來拍戲時，發現導演不再愛他，自己從未試過這麼愛一個導演。他說：「導演愛李榮浩多過我，唔知點解自己做乜都吃力不討好，我拉導演埋一邊講，一路講一路喊，從未試過，其實好瘀囉！唔係只會係女仔咁。」在旁谷德昭解釋指李榮浩是新人，只想給予更多信心，不過陳奕迅想埋一邊，更搞笑謂：「傻仔黎架！」隨即谷德昭在台上即錫啖陳奕迅，更謂暗地裏會嘴對嘴。

談到淚曬片場，Eason笑言可能年紀大會感性一點，不過有跟李榮浩講返這件事，對方覺得他講出來好，反而李榮浩話如果比他不知如何表達。問到演出動作戲可有受傷，他坦言有少少，當中醉拳720招式最難做，最後都做到，又指今次接拍該片有好多因素，因為做了兩年巡迴歌手覺得好死板，亦覺得自己不好笑，但導演認為他好有能量同傾談好多次。他說：「去到拍又投入到，其實好開心，拍完之後我係開心返，拍喜劇真係好開心。」

同場的林家棟，坦言在片場有喊過，因為演員有時會被劇本帶動，所以情緒不會太穩定跟住角色走，試過駕車時聽歌又想起一些事情也會眼濕濕，當拍喜劇會可能諗到好多無里頭的事。問到可會為爭寵而喊？他說：「通常導演錫你先會迫到喊，一定覺得你仲有好多空間同潛質去揸乾你。」