晨光追擊│「精彩駿將」再下一城

更新時間：17:30 2024-10-15 HKT
發佈時間：17:30 2024-10-15 HKT

今季練馬師榜前列鬥得緊湊，多位練者都交出極佳成績，其中方嘉柏雖然在谷草主場不算太出色，但在田戰一再建功，而且不少馬匹狀態極速到位，預期將會繼續交出佳績，是季初可靠捧場對象。

神速馬車開齋在望

第一場第五班一二○○米：「神速馬車」首季兩戰出戰同程都輸半個馬位，一次走位是10-8-2，另一次是12-12-4，兩仗都交出超強後勁，能力根本並非太差。可是之後馬匹的健康有問題，上季未能多跑，進度受到影響成績欠佳。「神速馬車」減分已多落到五班，上仗復出即跑第四，名次看似不俗，實則輸五個多馬位，到上仗就唔同晒，排一檔早段唔再太落後，然而去到九百米卻受阻，「木火龍駒」切入導至「賢心星」向內斜跑，「賢心星」再阻及「神速馬車」，更弊去到轉彎時要由內欄移出二疊，跟手去到彎尾再出四疊蝕位，若非以上情況已贏馬了。

「神速馬車」踏上大熟大勇境地，分利路合時刻可勝，跑法偏向後追，今戰快馬多形勢有利，開齋在望。

精彩駿將贏多場

第五場第四班一二○○米：「精彩駿將」乃上季J布拍賣馬，上季首仗角逐田草直路賽，出閘唔快全程在後，且大半程搶口極生硬，仍追回第五名只落後頭馬一個馬位，足見能力不俗。

「精彩駿將」今季復出卻揀了跑馬地短途出擊，或許在港同父馬不乏擅谷分子，加上本身翻步急密，轉戰細場有利無弊，結果順利得手，改變跑法搶放之餘，仲要沿途再無搶口，走規熟練得多。再看跑出時間真係嚇了一跳，締速一分九秒五六，不止快過當晚另外兩組四班頭馬，甚至快過三班頭馬「勇敢巨星」一分九秒九一。「精彩駿將」贏得如此出色，難怪蹄下敗將冠亞季殿軍「飲杯」、「新幹線」、「五福星」再出非冠即亞，「飲杯」更於三班補中。今次「精彩駿將」有力再下一城。