晨光追擊│「威武良駒」有料到

更新時間：16:55 2024-09-24 HKT
發佈時間：15:21 2024-09-24 HKT

自從姚本輝囝囝姚浩豐獲升為馬房副練後，這對父子兵成績斐然，不但曾於二○年封王，對上三季亦穩定地交出逾五十場頭馬，由此足以反映姚本輝在囝囝助陣之下，馬房兵力及成績確實更上一層樓。

第二場第五班一二○○米。「威武良駒」是前季來港H布馬，由於進度問題，去到上年十月尾才開上前線。首戰跑田草千二全程捱打，接戰扳上谷草一哩依舊差勁，跟手繼續變路程，並迅即加眼罩，可是效果一般，雪上加霜的是去到三月初，試閘時流了鼻血，因此被迫要唞影響進度。

「威武良駒」六月初復出，首次落到五班如常差勁，意外地一個月後再出竟變身，在煞科谷戰同程殺入冷腳，一再睇片，發現步速有利前置馬，「威武良駒」能夠留到極後追上唔簡單，暑期仲要減多兩分，目前評三十四分極具優勢。上周有五班谷草一千可上陣，廄侶「鑽飾翱翔」出戰該仗未有表現，更肯定幕後安排「威武良駒」出爭千二必有料到。

「威武良駒」目前評三十四分極具優勢，幕後安排出爭千二必有料到。

我做到評分有利

第五場第三班一六五○米：「我做到」上季尾大有進步，在613場出爭谷草一哩，排二檔起步以清脆利落姿態贏馬，接戰加分加磅，因為排八檔起步要留至尾列，難得直路仍奮力追上入Q。

「我做到」最近五戰皆不幸排外檔，上季728場輸遠看似威脅不大，實則好黏地跑道極利前置，有本事交出7-8-9-4走位，也是該戰唯一追近的馬。翌仗「我做到」排檔更差，變陣跟得較前，去到七百米更加速，跑法極蝕更遇超快步速。上季煞科戰唔跑谷草改攻田草，全因當時伍廄爭緊冠軍，可是十二檔實在太蝕，以致再次跑梗頸。「我做到」上仗回師同程搏命，無奈又排外檔，相對次次劣勢一樣表現出色，確認目前分數仍有利。