亨利拆局│練馬師王吼蔡約翰

更新時間：02:00 2023-02-12 HKT
發佈時間：02:00 2023-02-12 HKT

上期本欄推介羅富全，事後回看錯到七彩，除了全哥只得廿分未能封王之外，幫手攞分的「超音鼠」和「大眾開心」亦非我心水主力。但無論練馬師王或騎師王，過癮之處就在於此，往往能帶給捧場客驚喜。
回說今期練馬師王，各倉形勢非常平均，估計很可能如上期開出低分數，既然揀二三綫倉沒有把握，即使蔡廄惡馬唔算多，計落已相對較穩陣。
第十場「永麗美麗」當然是爭分主力，無疑初跑千四大有難度，不過上仗走三疊都贏，居三班擺明超級。而觀乎血統，千四只會有好無壞，希望今次加程能藉着一檔克服障礙。
第一場「當家信心」跑田草稍打折扣，不過上仗從馬林後追接近，啟示評分已有迴旋餘地。第三場「笑哥兒」忽然上從化兼兩試大閘，部署似針對今次縮程，不敢睇小。廄侶「旋風飛影」上仗賺轉彎貼欄，不過早段留後蝕慢步速1，尾兩段能造最快時間，表現算及格。第七場「張燈結綵」因為配潘頓而隔晚成熱，予人不安感覺，但上仗直路發揮隨意亦衝近，以馬論馬要吼實。第八場「快錢」兩戰千四獲冠亞，優點無謂多講。第九場「驚喜」大致見盡，入位要靠對手失準。

目標：蔡約翰

賠率：2.4

立即下載 | 全新《星島頭條》APP : https://bit.ly/3yLrgYZ