「補習丸」IG帳號一年內吸逾萬粉絲成小學生偶像 11歲港童盼成周星馳2.0︳親子專訪

你還記得11歲時的自己在做甚麼嗎？與其他同齡小朋友一樣，年僅11歲、正就讀小六的周永傑及其好友「老Best」每天的生活同樣離不開返學、讀書、考試。在面對忙碌的學習生活之餘，永傑閒時喜歡看周星馳的電影紓緩壓力，更發揮創意將當中不少經典情節進行二次創作，拍成影片放到社交平台Instagram分享。帳號創立短短一年時間，就吸引了過萬名粉絲。雖然永傑年紀輕輕，但已經立志成為演員，更冀望藉影片為大眾注入正能量。

「10後」疫情入坑成周星馳粉絲

周永傑的IG帳號名為港產00J（IG@hk00j_hk），原來這個名字的由來是源於其偶像周星馳的其中一套經典之作 ——《 國產零零漆》。

周星馳的電影相信伴隨着不少70、80後成長，但對於永傑這位「10後」，按理說應該感到陌生。他解釋，早在兩、三年前，因疫情只能留在家中上網課，上完課感到無聊便上YouTube找些影片解悶，偶然間看到一小段《逃學威龍2》的花絮片段，成功吸引他注意。「記得嗰段係講潛伏喺學校做臥底嘅周星馳終於成功搵到接應佢嘅警隊同事，但又咁啱被佢女朋友撞見，令我覺得好笑之餘又有啲尷尬。」他續指當時的他其實並不知道周星馳是誰，但看完那段片後便好奇上網搜尋有關他的資料，希望了解他更多，結果接連看了《逃學威龍》及《逃學威龍2》，「入坑」成為小粉絲。「依家差唔多睇晒佢全部作品，每次睇佢嘅電影都會笑到肚痛。」而這位小粉絲更有一個遠大的夢想。「我希望大個之後可以成為好似佢咁帶畀人正能量嘅人。」（會否希望像他那樣自導自演？）「做住演員先啦！」永傑略帶靦腆地笑着說道。

「食咗補習丸 IQ直線上升」

永傑的影片還有一獨特標誌 —— 補習丸。永傑解釋，補習丸是受保濟丸啟發而成，因為經常聽到這個廣告，覺得當中的廣告歌好「洗腦」。「一聽到嗰旋律就知道係依首歌，之後就創作咗『補習丸』，食咗佢，IQ就可以直線上升，增強幾萬倍。」變得更聰明，相信是不少人的願望，但永傑指「補習丸」更多的是代表一種精神，希望將更多的正能量和歡樂傳遞畀觀眾。

縱然有演員夢，但仍需靠「伯樂」扶持，而這位伯樂正是永傑的繼父兼補習老師Peter叔。「佢教咗我好多嘢，又教我英文，令我知道讀書嘅重要性，仲幫我實現夢想。」現時，永傑IG帳戶內的大部分影片均由Peter叔出手拍攝及剪接。「通常我會畀一個大方向或主題，然後鼓勵永傑自己上網睇資料、『度橋』、寫對白。」一旁的Peter叔補充道。永傑表示自己寫完之後會先給Peter叔過目，畢竟自己的語文水平有限，有時寫出來的東西可能會有點怪或不通順，需要Peter叔幫忙修飾。

與「老Best」組兄弟幫

與永傑經常合作的「老Best」，由幼稚園開始兩人就一直是同學，在徵得「老Best」媽媽同意後，Peter叔便邀請「老Best」加入拍攝。「記得第一次好似拍咗一個鐘左右，因為佢（「老Best」）成日記唔熟台詞，背咗好耐。同埋睇住對方會忍唔住笑，上堂嗰陣都係咁。」雖然如此，但這一年來合作拍片也沒有試過意見不合，而兩人相識多年也很少吵架。

然而感情再好都有「分歧」的時候。身為混血兒的「老Best」英文能力較強，中文則相對較差，偏偏永傑最怕的就是英文Grammar。「因為同中文好唔同，句子嘅結構可以完全前後調轉。」永傑更笑言兩人不能互補。

「老Best」： 「因為每次溫英文佢就話唔想學。」
永傑： 「我唔想你教我呀，好煩！」
「老Best」： 「我點煩呀？我好有耐性教你㗎！」
永傑： 「 望住你教我就會忍唔住笑，然後畀Peter
叔鬧。」

慢慢傾談下來，兩位小朋友沒有訪問剛開始時那麼緊張，你一言我一語，非常搞笑。

每次Peter叔剪完片之後，都會先讓永傑看一次。「睇返自己啲片會有種成就感，而且睇到啲搞笑位自己都會忍唔住笑，Peter叔仲話如果自己睇返會笑就代表條片成功。」對於拍片，永傑表示一開始覺得頗尷尬。「你諗吓，一出街啲人就認得你、叫你，都驚畀人笑，所以一開始死都唔肯出自己樣，係後尾Peter叔不斷說服我。」一旁的Peter叔說，要成功就一定要勇敢走出來，就算升中面試一樣要對人，而事實亦證明他和「老Best」有能力做到。

升中面試偶遇fans

談到升中面試，永傑分享了不少趣事。「我面試嘅時間係早上九點幾，入去嘅時候咁啱撞到一個fans出嚟，可能佢啱啱面試完，當時附近有好多人，他大聲嗌『補習丸！補習丸啊，Hello！』，我就禮貌地同佢say返hello，後來佢仲有喺我升中面試嗰條片下面留言，話佢就係當日嗌我嗰個人，相認之後我都有邀請佢同我一齊拍片。」而永傑提及的那條有關升中面試的片其實也是正式面試前所拍，當作是模擬面試。「嗰條片嘅結尾有個反轉，就係講原來校長係爸爸，校董係爺爺，我都有畀同學睇，佢哋大部分睇到依個位都忍唔住笑，話我帶住眼鏡嗰樣好cute，其實老師嘅造型我係模仿之前一位好紅嘅新聞人物 —— 何太。而且因為我本身無近視，要問Peter叔借佢嗰副六百幾度嘅眼鏡嚟戴，但當我刻意扮『鬥雞眼』嗰陣又會睇得清，好神奇。」

除了在學校門口遇到粉絲，就連帶永傑上面試室那位中學生也是他的支持者。「佢一見到我就話『如無意外，我就係帶你上去面試嗰個中學生。』」（去中學面試有好多人認得你？）「唔知呢？可能都有10個？但都有差唔多人數喺我條片下面留言，話想我做到佢哋學弟。平時喺街、返屋企搭𨋢都有小朋友認得我，我住嗰度就最少有四個，佢哋會互相分享，又會靜雞雞同佢哋媽咪講，然後佢哋媽咪就會拎手機開IG睇我嘅片。同埋試過有fans放學撞到我，中學生嚟嘅，問我可唔可以合照，仲請我飲杯四十幾蚊嘅嘢。」永傑的IG account還成功引起面試老師的注意。「面試嘅時候我同面試官講我有IG account，佢都有問我相關嘅問題。

永傑的影片還不時提及Band 1英中，他解釋：「因為佢哋畢業生入大學嘅比率比Band 2、Band 3高，學習風氣都比較好。以前嘅我真係唔知道咩係Banding，甚至覺得自己一定可以入到皇仁書院，但後尾Peter叔同我分析，入皇仁嘅機會不太大，實際少少好，一揀錯咗最後可能會跌到落好後志願，派咗去自己都唔了解嘅中學。」落筆之際，永傑剛收到心儀中學的取錄通知。「我都好想借呢個訪問多謝小學嘅老師同嚟緊入讀嘅中學，多謝佢哋畀機會同支持我，成個六年級應該得幾個唔識我，我諗依家學校都有一半老師知道我有拍片，試過有老師email我話有喺facebook睇我啲片，仲加咗個笑嘅emoji，讚我好可愛。之前『東張女神』Maggie都有喺我啲片下面留言，好開心呀，因為之前有啲片都係講緊佢。佢哋嘅支持都係我拍片嘅動力。」

到18區老麥「破地獄」

升中以外，麥當勞可說是永傑影片出現得最多的場景。「因為我鍾意食，最鍾意食脆香雞翼。平時會點辣醬，如果喉嚨痛就唔點。一個禮拜差唔多食兩次，好似好多，不過一盒雞翼都會拍好多條片，你睇我哋啲衫就知。」剛完成呈分試的永傑已達成今年IG有10,000位粉絲的目標，而接下來將會到全港18區，每區都去一間麥當勞找人「破地獄」（即唱〈普渡眾生〉的改編版）。「其實我無睇過依部電影，淨係知道唔係恐怖片，同埋係一個儀式，呢啲都係Peter叔講畀我聽。」一旁的Peter叔更「踢爆」，向永傑說完破地獄當晚，永傑嚇得睡不着覺。「我一合埋眼腦入面就浮現好多隻鬼喺我嘅床頭飄過、徘徊，甚至幻想嗰啲鬼係咪好似蜥蜴咁，匿喺天花版望住我、嚇我，所以一合埋眼就想打返開。」

小朋友的想法總是天馬行空，麥當勞除了可以「破地獄」，還有「失戀套餐」。「呢個就真係我諗出嚟嘅，因為之前有位叫七仔嘅fans想搵我哋一齊拍片，點知『老Best』對人一見鍾情，拍完之後瞞住我同Peter叔私下聯絡人，每朝都主動發訊息畀人，結果七日後就被人block咗，哈哈！當時又咁啱情人節，就諗到將呢件事作為拍攝題材。」但年紀輕輕真的知道甚麼是失戀嗎？「少少啦！其實大家唔熟，依家見到會好尷尬。」「老Best」說道。「所以依家有七仔嘅片佢都話自己唔想出現，每次提起人都臉紅。」永傑在旁邊「補插一刀」。（笑！）永傑續指老師有教過何謂「拍拖」、「失戀」。「『老Best』經驗多過我，佢暗戀過好多女仔，一至三年級有個女同學，然後Sarah，跟住七仔⋯⋯踢波嗰陣又識咗另一個女仔，仲話白色情人節要送朱古力畀人，但最後都無送到，最少已經四個。」嚇到「老Best」連忙否認：「中學先拍拖。」但當說到談戀愛會做甚麽時，永傑卻給出一個讓人哭笑不得的答案：「Kiss Kiss！」人細鬼大，諗頭多多，也難怪能夠在短時間內吸引如此多的粉絲，成為「萬人迷」了。

文：林詩敏

圖：陳仲樑、部分由受訪者提供

相關文章︳以母親視角重新解讀《虎毒不》 陳小娟：「好媽媽不等同 要犧牲自我」︳親子專訪

相關文章︳走出喪親之痛蛻變成輔導員 陳敏兒：「孩子是父母的人生教練」︳生死教育