胡慧沖 - 橫琴之行大開眼界 | 筆泰沖動

更新時間：02:00 2026-10-30 HKT
發佈時間：02:00 2026-10-30 HKT

　　相隔廿多年重返內地，橫琴之行令我大開眼界！

　　上星期有幸獲得橫琴粵澳深度合作區產業發展局旅遊會展處處長林衍傑先生（Vic Lam）嘅盛情邀請，參加橫琴當地舉辦嘅「2026澳琴露營節」活動，仲有機會同大家分享一啲泰國旅遊同露營嘅經驗，實在非常開心！

　　今次亦有機會同林先生簡單交流，雖然只係短短一段Chat，但已經感受到佢對旅遊業發展嘅熟悉同熱誠。能夠有咁樣嘅交流機會，對我嚟講亦係一種難得嘅收穫！

　　講出嚟可能大家唔信，小弟已經超過20年冇踏足內地！今次第一站嚟到橫琴，自然有一種既陌生又新鮮嘅感覺，甚至有少少「劉姥姥入大觀園」！

　　最令我印象深刻嘅，係今日橫琴呈現出嚟嘅城市面貌、規劃同各種新建設。短短幾日，雖然未有機會深入了解每一個角落，但已經令我對呢個地方產生咗更多好奇，亦希望將來有機會進一步探索。

　　大會仲非常細心，安排我入住橫琴DoubleTree by Hilton酒店兩晚。酒店設計鮮明，別具特色，設備亦相當新穎，無論房間設施定整體住宿體驗，都令我留下非常好嘅印象！

　　今次旅程除咗讓我接觸到不同嘅露營旅遊文化，更加難得嘅係認識到一班對旅遊業充滿熱誠嘅朋友。最後再次衷心多謝林先生、大會各位工作人員以及所有協助今次活動嘅朋友！由接待、住宿到活動安排，都感受到大家嘅用心。

　　對一個超過20年冇返過內地嘅人嚟講，今次確實係一次充滿新鮮感同新發現嘅旅程！

　　一個住在曼谷超過十年的香港人，人稱泰國通。

胡慧沖