KellyChu - 《黑白大廚》Edward Lee夥星級名廚 美酒佳餚巡禮十手聯乘獻盛宴 | Executive日記
發佈時間：02:00 2026-10-30 HKT
旅發局喺中環海濱活動空間及添馬公園舉行年度旗艦盛事「美酒佳餚巡禮」，國際名廚匯聚，係美食愛好者嘅福音。全球爆紅嘅《黑白大廚》令多位韓國名廚衝出國際，今年美酒佳餚巡禮亦請來白湯匙第二名Edward Lee參與限量十手聯乘嘅盛宴。佢同上海米芝蓮名廚陳志評、香港米芝蓮粵菜名廚劉耀輝、法國米芝蓮名廚Thierry Marx及《一飯封神》第二名楊豔彬，合作打造「品味館」嘅限量十手聯乘盛宴「歲月之味」，喺香港呢個美食天堂，以廚藝為大家帶來驚喜！
「歲月之味」盛宴菜品，融合中西烹調特色，炮製五道創新精緻佳餚，分別有Thierry Marx嘅「魔鬼龍蝦南瓜味噌伴魚子」、楊豔彬嘅「永春老醋汁花膠」、陳志評嘅「蔥頭油荔浦芋頭燒溏心鮑」、劉耀輝嘅「砵酒大根牛面頰」及Edward Lee嘅「柿醋燴豬腩·泡菜醃椒」。各道菜配上美酒，真係令人開心。
其中「蔥頭油荔浦芋頭燒溏心鮑」取材來自廣西嘅「芋中之王」，更只提取其最嫩最香嘅芋心入饌，以紅燒肉汁長時間燉製，配上鮮味濃郁溏心鮑，粉糯惹味，口感豐富，一試難忘。而創意無限嘅Edward Lee再以其西廚精湛技藝重新演繹韓國傳統食材，柿醋燴大大件豬腩酸甜開胃，仲用燒豬皮碎料配汁，一啲唔膩，入口即化，令人好滿足。「品味館」座位有限，識飲識食之友，一早搶位，一千五百元一位連酒，抵到無朋友，所以一早售罄。
緊隨巡禮之後，旅發局「香港美食月」由11月1日至11月30日接力登場，巡禮參加者憑票尾，可到全港指定多間餐廳及酒吧享用頂級餐飲體驗，以及連串期間限定體驗，感受香港日夜都精彩嘅餐飲魅力。旅發局話，期望藉此吸引旅客延長留港、帶動更多消費，為業界創造更多商機。另外，旅發局亦推出「香港宵夜地圖」，推介城中夜間餐飲熱點，展現香港充滿活力嘅深夜餐飲文化。
KellyChu
