KellyChu - 《頭條日報》周六《起筷》　「美食女團」華麗出道 | Executive日記

更新時間：02:00 2026-10-13 HKT
發佈時間：02:00 2026-10-13 HKT

　　《頭條日報》Saturday由10月17日起，逢周六推出全新《起筷》特輯，為讀者搜羅城中最新最潮嘅美食情報，同時引入強大專欄作家陣容，由三位女士組成嘅「美食女團」正式出道，佢哋分別係殺入內地節目《一飯封神》12強嘅90後新銳主廚鄭紫欣（Kobe）、帝京酒店獅房菜助理主廚譚詠儀師傅，以及識飲識食嘅專業吃貨唐嘉碧（Cally）！

　　三人合組嘅專欄名為《美食女團》，真係好貼切。講起Kobe，大家都知道內地粉絲叫佢做「化學系靚廚」，皆因Kobe大學主修化學，而佢自幼喜歡入廚，選擇從事與主修科目不一樣嘅職業，大學未畢業就學廚，喺餐飲業開創屬於自己嘅一片天。Kobe將喺專欄分享佢嘅法式美味故事，粉絲們唔好錯過！

　　中菜大廚以往由男性主導，但時至今日，女中廚巾幗不讓鬚眉，代表人物之一，就係「獅房菜」嘅小儀師傅。佢入得廚房出得廳堂，多年來努力進修，鑽研粵菜，以創意升級傳統佳餚，贏得眾多食客歡心。小儀師傅私底下亦都係一位美食家，會喺專欄同大家分享香港各式各樣嘅地道美食，將自己嘅美食地圖大公開！

　　活躍於香港飲食界嘅唐美人Cally，食遍香港18區隱世味道，又遊走內地大江南北，追尋舌尖上的好味道，多年來喺《星島日報》等刊物同大家分享佢嘅味蕾體驗，既有品味又有「食」力。Kelly跟住Cally去搵食，每次都有驚喜！佢對推廣中華飲食文化不遺餘力，出任香港中廚師協會義務公關總監，對佳餚美酒無所不識，也無所不言，Kelly好期待佢喺《起筷》嘅分享。

KellyChu