胡慧沖 - 大家真係好擔心泰國 | 筆泰沖動

更新時間：02:00 2026-10-09 HKT
發佈時間：02:00 2026-10-09 HKT

　　最近打開社交平台或者同朋友傾偈，話題三句不離泰國。大家口口聲聲話「好擔心泰國」，但老實講，又有幾多人真係出於對泰國當地人水深火熱嘅同情？更多嘅，其實係擔心緊自己張機票、訂咗嘅酒店，同埋心心念念嘅假期會唔會泡湯。

　　回心一想，大家對呢個旅遊熱點嘅集體焦慮從來冇停過。先唔講網上傳到似層層、彷彿一出機場就會被綁去KK園嘅荒謬謠言；早排又話有蝙蝠病毒隨時大爆發，之後又傳印度輸入神秘病毒，講到行入商場都會中招咁款。到早一陣子泰國部分地區水災，網民嘅想像力更加無限放大，有人擔心行街會撞到鱷魚，又驚積水生大量蚊患引致傳染病。結果呢？大部分傳聞根本冇想像中咁嚴重，街照行、夜市照開，曼谷人如常生活，甚至乎大雨過後，現在每天都陽光普照，現實同恐慌往往差天共地。

　　最近一波嘅焦點，又變咗做俄羅斯嘅所謂「鼠疫」。事緣有泰國靈媒預言泰國將會係重災區之一，大批人會出事。預測呢家嘢，信則有不信則無，但大家已經「擔心定先」。退一萬步講，如果真係有一種傳播力同殺傷力咁強嘅超級鼠疫爆發，受衝擊嘅又點會得泰國一個地方？隨時全世界、包括大家身處嘅城市都難以倖免。如果連呢種無從考證嘅遠期預言都要日驚夜驚，人生真係無一刻可以安心。

　　正如泰國氣象局早幾日預告，話會有連場傾盆大雨、北部洪水南下令昭披耶河氾濫，曼谷隨時迎嚟新一輪大水浸，搞到人人自危；但最後天公作美，預想中嘅災難並冇發生。好多時候，嚇死人嘅唔係事實，而係大家腦海入面嘅無限想像同未發生嘅恐懼。

　　太遠嘅事，擔心唔嚟；未發生嘅劫數，更唔需要提早預支焦慮。與其日日被未經證實嘅傳言牽住鼻子走，不如活在當下，好好珍惜眼前擁有嘅一切。

　　一個住在曼谷超過十年的香港人，人稱泰國通。

胡慧沖