胡慧冲 - 大家真系好担心泰国 | 笔泰冲动

更新时间：02:00 2026-10-09 HKT
发布时间：02:00 2026-10-09 HKT

　　最近打开社交平台或者同朋友倾偈，话题三句不离泰国。大家口口声声话「好担心泰国」，但老实讲，又有几多人真系出于对泰国当地人水深火热嘅同情？更多嘅，其实系担心紧自己张机票、订咗嘅酒店，同埋心心念念嘅假期会唔会泡汤。

　　回心一想，大家对呢个旅游热点嘅集体焦虑从来冇停过。先唔讲网上传到似层层、仿佛一出机场就会被绑去KK园嘅荒谬谣言；早排又话有蝙蝠病毒随时大爆发，之后又传印度输入神秘病毒，讲到行入商场都会中招咁款。到早一阵子泰国部分地区水灾，网民嘅想像力更加无限放大，有人担心行街会撞到鳄鱼，又惊积水生大量蚊患引致传染病。结果呢？大部分传闻根本冇想像中咁严重，街照行、夜市照开，曼谷人如常生活，甚至乎大雨过后，现在每天都阳光普照，现实同恐慌往往差天共地。

　　最近一波嘅焦点，又变咗做俄罗斯嘅所谓「鼠疫」。事缘有泰国灵媒预言泰国将会系重灾区之一，大批人会出事。预测呢家嘢，信则有不信则无，但大家已经「担心定先」。退一万步讲，如果真系有一种传播力同杀伤力咁强嘅超级鼠疫爆发，受冲击嘅又点会得泰国一个地方？随时全世界、包括大家身处嘅城市都难以幸免。如果连呢种无从考证嘅远期预言都要日惊夜惊，人生真系无一刻可以安心。

　　正如泰国气象局早几日预告，话会有连场倾盆大雨、北部洪水南下令昭披耶河泛滥，曼谷随时迎嚟新一轮大水浸，搞到人人自危；但最后天公作美，预想中嘅灾难并冇发生。好多时候，吓死人嘅唔系事实，而系大家脑海入面嘅无限想像同未发生嘅恐惧。

　　太远嘅事，担心唔嚟；未发生嘅劫数，更唔需要提早预支焦虑。与其日日被未经证实嘅传言牵住鼻子走，不如活在当下，好好珍惜眼前拥有嘅一切。

　　一个住在曼谷超过十年的香港人，人称泰国通。

胡慧冲