KellyChu - 一連11日3000花燈璀璨 8米巨型榕成打卡熱點 旅發局國際中秋綵燈匯9‧17維園閃亮 | Executive日記
發佈時間：02:00 2026-08-28 HKT
「海上生明月，天涯共此時。」今年中秋，維園將變身成一個國際級光影樂園——旅發局首度舉辦「國際中秋綵燈匯」，以「團圓」為主題，由9月17至27日盛大登場，等你帶埋摯愛親朋，一齊行入呢場交織世界文化嘅光影盛宴，過一個色彩斑斕嘅中秋佳節。
根據旅發局嘅設計構想圖，行入維園，就好似踏入跨地域嘅綵燈宇宙。全場焦點「世界綵燈大街」，集齊超過3000盞來自20個國家地區嘅特色燈籠：韓國晉州絲綢燈籠，優雅細膩；巴西七彩拼布燈籠，熱情奔放；波蘭綵燈更以民間「洛維奇」剪紙工藝點綴，處處都係異國風情。而同場仲有康文署舉辦嘅「丙午年中秋綵燈會」，傳統與國際並肩登場，真係行一步一個驚喜。
如果話世界燈籠令人眼界大開，咁國家級非遺「南京秦淮綵燈」，就絕對將成個意境推上另一層次。旅發局今年特別請嚟秦淮綵燈製作團隊，為維園度身打造四組巨型燈藝，當中最矚目嘅，就係聳立喺正門、高達8米嘅「樹影流光」——作品以香港標誌性大榕樹為靈感，枝葉層層疊疊，連綿的氣根象徵香港連通世界嘅生命力。大家可以喺月光下穿梭樹影，360度全方位打卡，感受團圓嘅溫暖時刻。
呼應「團圓」主題，園內隨處可見圓形元素嘅綵燈，而最應節嘅打卡熱點，一定係「荷塘月色」——7米高嘅巨型明月高掛喺荷塘之上，同池中荷花燈互相輝映，如詩如畫。如果想重溫香港情懷，就要過嚟「香港綵燈庭」，超過400盞本地手紮花燈璀璨綻放，玉兔、楊桃、金魚等經典造型，滿載老香港嘅中秋記憶，帶你回味嗰份獨有嘅中秋風情。
旅發局節目及旅遊產品拓展首席顧問洪忠興話，香港本身係中西匯聚、聯通世界嘅城市，適合打造「只在香港」嘅國際中秋盛會，推動節慶旅遊之餘，中秋氣氛格外熱鬧。佢預計活動將吸引約一成至一成半旅客，加上維園交通方便，參與人數一定相當可觀。中秋當晚會實施人流管制，確保大家玩得開心又放心，共度圓滿中秋！
KellyChu
