KellyChu - 10．11登場今起報名首推「56公里組」香港單車節踩勻「五隧三橋」 | Executive日記

更新時間：02:00 2026-08-20 HKT
發佈時間：02:00 2026-08-20 HKT

萬眾期待的「新鴻基地產香港單車節」將於10月11日捲土重來！今屆非競賽項目大升級，「50公里組」加碼至「56公里組」，仲推出全新「五隧三橋」大考驗，踩勻中九龍繞道、長青隧道、南灣隧道、尖山隧道、沙田嶺隧道，再加青馬大橋、汀九橋同昂船洲大橋，一次過滿足晒車手「捐窿過橋」嘅願望！

　　如果驚自己未夠力，可以揀返「32公里組」，繼續玩「兩隧兩橋」（長青隧道、南灣隧道、昂船洲大橋及汀九橋），輕鬆又睇到靚景。兩組別均以西九文化區博物館道做起終點，總共開超過6500個名額，今朝10點開始接受報名，記得睇住時間啦！

　　專業賽事方面同樣星光熠熠，「國際單車聯盟（UCI）1.1級公路賽」載譽歸來，雲集11個國家及地區嘅17支頂尖車隊，當中包括6支世界巡迴賽勁旅，仲有主場出擊嘅中國香港代表隊，約100名頂級車手喺全新100公里起伏賽道展開破風激戰。今年仲首度舉辦「世界大學盃」，邀請到內地及海外知名學府，派出百強大學車手參加「56公里組」同場較量。

　　唔識踩車但又想體驗氣氛嘅朋友唔使灰心，西九藝術公園大草坪同日會有大型單車嘉年華，結合影音表演、特色餐飲、新興運動同手作體驗，啱晒一家大細或者同朋友嚟放鬆一下。

　　旅發局主席林建岳喺啟動禮話，期望透過單車節向市民旅客呈獻「只在香港」嘅騎行體驗，穿越標誌性大橋及地標，飽覽繁華都會與迷人海港嘅獨特景致。

KellyChu