KellyChu - 登機口變身電競樂園單車滑浪網球任你玩 | Executive日記

更新時間：02:00 2026-07-23 HKT
發佈時間：02:00 2026-07-23 HKT

　　暑假係港人出遊高峰，為咗提升機場體驗，機管局上星期五開始，喺一號客運大樓離港層11號登機閘口附近，增設咗電競體驗區，場內有8款運動主題電競設備，包括單車、滑浪風帆、網球、單板滑雪、賽車及劍擊等，供公眾免費使用，啱晒大小朋友齊齊放電。

　　疫情期間唔少人會喺屋企玩Wii Sports，拎住遙控對住電視螢幕就可以打網球、碌保齡球，打破做運動必須去到運動場先做到嘅限制。呢個另類方案當然比不上真正嘅運動，但對於喺室內都想郁動吓身子嘅朋友仔而言，不失為一個好選擇，亦十分符合都市人追求善用時間嘅特質。

　　今次機場增設嘅電競體驗區正正讓旅客可以喺等待登機或轉機期間作伸展運動，順道消磨時間。機管局署理行政總裁姚兆聰透露，呢項設施啟用頭3日已經錄得超過三千人次參與，反應熱烈，體驗區亦計劃維持開放至少一年。佢表示，現時正值暑假旅遊高峰期，所以機場推出一系列老少咸宜活動，希望提升旅客體驗。機管局亦計劃下個月舉行文化節，以及音樂、舞蹈活動等。

　　昨日牛下女車神李慧詩現身出席體驗區活動，佢表示自己平時訓練時也會踩單車機，認為機場有運動體驗區十分吸引，需要乘搭長途飛機或轉機嘅旅客亦容易「腳腫」，可以透過輕度運動作出紓緩。

　　教大健康與體育學系高級講師雷雄德從健康角度分析，指世衞建議每坐立1個小時，應活動1至2分鐘左右，以作伸展，搭長途飛機久坐易影響血液循環，而體驗區嘅運動設備涉及大肌肉運動及心肺功能，對維持健康有良好作用，不論老中青朋友都能參與。佢認為，動感電競遊戲對於推廣體育文化有正面作用，鼓勵大家善用設施。

KellyChu