KellyChu - 美心鹹味月餅開創中秋新體驗 「麻辣牛肉」「XO醬豬肉」佐酒配茶皆宜 | Executive日記
發佈時間：02:00 2026-07-22 HKT
雖然距離中秋尚有兩個月，但市面已陸續有新款月餅登場。今年迎來70周年嘅美心集團，更破天荒推出兩款全新鹹味月餅，分別係「麻辣牛肉月餅」及「XO醬豬肉月餅」，打破月餅只有甜味嘅傳統。兩款月餅只在香港發售，同Kelly一樣鍾意試新嘢嘅朋友仔，記得入手！
Kelly已率先嘗鮮，私心推薦鹹香微辣嘅「麻辣牛肉月餅」，內餡用咗四川花椒和雲南辣椒調味，再配合風乾牛肉及川式辣醬，香氣誘人，口味層次鮮明，一試上癮。「XO醬豬肉月餅」則使用美心自家調配XO醬，配搭干貝、蝦米等食材，令豬肉餡增添一份鮮味和微辣感，比起傳統甜味月餅，呢款月餅更啱佐酒、配茶，令你打開月餅新世界。
智能生產減少重複工序
美心仲有推出更多新意思，包括與黎子安大廚聯乘嘅「美心本味三賞」，有流心柚子味芝士月餅、黑松露羊肚菌金華火腿月餅、無花果朱古力月餅三款口味，以及迎合杜拜式開心果朱古力熱潮呈獻全新冰皮月餅口味。而為與市民分享70周年喜悅，美心亦特別推出咗一款可以將餅盒變身成為伸縮望遠鏡嘅紀念版禮盒，寓意展望未來，同大家一起望得更遠！
講到月餅，最經典亦每年都要有嘅一定係雙黃白蓮蓉。美心雙黃白蓮蓉月餅自1998年起，已連續28年榮獲全港月餅銷量總冠軍，背後秘訣係製作嚴謹用心，不但選用上乘湘蓮和優質鹹蛋，每顆放進月餅嘅鹹蛋亦要求達到約14克大小，並堅持於香港月餅廠房處理鹹蛋，以保留鴨蛋本身嘅鮮香與油分，令成品展現更穩定嘅鹹香、油潤與沙感。
小妹昨日走進廠房參觀，見到粒粒鹹蛋閃令令，員工將佢哋放入機器後，便會連同處理好嘅蓮蓉，透過打餅機自動製成月餅。一個個月餅，經輸送帶蓋好模後，由掃蛋機械手均勻抹上蛋液，最後送進焗爐，效率滿分。如此智能生產減少咗大量重複工序，讓前線員工可以將更多精力投放於品質監察及流程管理，才能達致每天出產數十萬顆月餅嘅生產規模，銷往全球20個國家、300個城市。
KellyChu
