方力申渡海泳|出戰前遭老婆葉萱訓話 曾出現負面情緒凍到腳震頭痛 游到最後迴光返照:今次真係辛苦
發佈時間:21:00 2026-11-21 HKT
方力申(Alex)今日(21日)參與慈善挑戰「凝動全城 破浪傳承:方力申港澳慈善游2026」,於今晨8時53分於大嶼山雞翼角孤身躍入海中,挑戰長達35公里的港澳公海橫渡,經過逾8小時的努力,方力申終於僅花08:37:24順利抵達澳門黑沙海灘,比預期快約20分鐘,更打破歷年記錄,小方這次的港澳慈善游,籌得逾800萬。
方力申出戰前遭太太葉萱訓話
完成創舉行,方力申無縫接力參與「《浪接.浪》港澳群星慈善音樂會」,在音樂會開始前,方力申表示自己已清醒了一點,又笑指太太葉萱在出戰前跟他講已年近50 ,仔細老婆嫩,不要再搞這些,方力申指很感恩自己的技能也可以幫到人,但他指在游時也跟自己說:「真係游埋呢次,真係搞唔掂,今次真係好辛苦。」
相關閱讀:方力申成功挑戰35公里港澳慈善游 僅花08:37:24完成目標 籌得890萬善款支援基層及SEN兒童
方力申指最初首公里已很大浪,游完一小時已經攰,不如如何捱,去到第四小時水溫突然跌了三度,只有21、22度左右,就算自己不怕凍也頂不順:「凍到頭痛,我一路踢腳,淨係feel到上五寸下五寸隻腳郁緊,兩個腳掌我係feel唔到,我一路游嘅時候就心諗咁樣游真係游唔到,但仲頂得順,因嗰陣時都係四個鍾,仲有啲體力嘅,但係到六個鐘開始,我係凍到游緊都震,我都未試過,自己都keep唔到體溫。」
方力申又坦言有幻想過自己有可能游不完,隨之又產生負面情緒:「我喺度諗死喇,我又頭痛,跟住而家又咁攰,萬一咩低溫症嗰啲會唔會頭暈?會唔會暈到跟住暈低?啲水咁濁,跳落嚟都搵我唔到,咁我死梗,一定冇人救我啦!真係死梗喎!嗰一刻我嗰啲負面情緒就係我老婆啱啱有咗,佢點算?我喺度諗好多呢啲嘢,跟住我就諗游埋呢次真係算。」而方力申笑言游到接近終點時,見到有人即有種「迴光返照」的感覺,才開始有返力氣。
相關閱讀:方力申自豪女兒Isla將來係Party Girl 坦言:呢啲一定唔係遺傳我 網民讚節奏感強具音樂天分

















