搭紅Van無帶現金司機大膽提出以一物易車資港女變相有錢收疑似事主現身講細節｜Juicy叮

更新時間：15:40 2025-10-16 HKT
發佈時間：15:40 2025-10-16 HKT

有乘客搭紅色小巴由西貢出銅鑼灣時，由於無帶現金在身，司機有急才地提出以一物易車資，令女乘客變相有錢收。疑似女事主事後驚喜在網上留言，親述事件細節。詳情見下圖及下文：

搭紅Van無帶現金司機大膽提出以一物易車資港女變相有錢收逐張睇↓↓↓↓

樓主：香港人真係好正

樓主本月11日在社交平台Threads發帖，指「香港人真係好正」，講述坐紅Van時的所見所聞：

•港女：淨係收Cash（現金）？
•司機：係呀。
•港女：喔咁要撳錢（準備落車）。
•司機：唉你陣間七仔（便利店）幫我買包煙，我俾返錢你，就咁啦。
•港女：哦。
（1小時後，紅Van由西貢到咗銅鑼灣）
•司機：拿你幫我買包煙啦。
•港女：哦，買邊隻？
•司機：紅萬呀，知唔知萬寶路，紅色。
•港女：哦，OK。

樓主續指，「然後港女去七仔排隊。成個交易好Smooth（順暢）好彈性。香港小巴佬急才小癲，又學到嘢。（車費$25×2，一包紅萬好似80蚊，應該係港女幫買完煙司機俾返$30佢）」。

有回應的網民查問「仲未理解到，萬一乘客早落車買唔切煙點算，點解係$25x2，同埋其實乘客落車撳錢再搭下一架有機會係咪會快過上車再中段落車成車人等乘客幫司機買煙」。樓主回應時解畫「冇中途站㗎，西貢滿客直剷銅鑼灣尾站，齊人就開車」。

疑似事主驚喜留言

疑似事主翌日（12日）也驚喜地在回應欄留言，「Hi，琴日係我哋兩個港女成世人第一次買煙。btw（順帶一提）係$105（一包煙）」。

回應的網民直指，事件中「大家講個信字」、「搭紅Van尤其呢條線嘅客同司機都好有互信，一來熟口熟面，二來Call車留位服務已經培養咗一種互相信任的精神（前西貢居民）。

也有人大讚「成單嘢好香港」、「好獅子山下Feel（感覺）（正）」、「這個港女幫司機買煙的故事真有趣，感覺香港小巴生活很隨性又彈性。買煙、付錢、坐Van都能順利搞定，還帶點小趣味。這種日常小互動才是真正的香港味道，看到就會笑出來，也學到一些小聰明」。

網民：好鍾意呢啲香港人故事

由於有網民留言「好鍾意呢啲香港人故事！」，不少網民慷慨分享自己出行時遇上的窩心故事：

•好記得30幾年前我搭Van仔去銅鑼灣，落車時要俾5蚊，我冇碎銀，俾張100蚊佢，個司機話冇得找，我呆一呆，諗住點算好，我後面跟我落車個年輕人伸手俾錢個司機，話幫我俾埋，落咗車，我同佢講明日喺邊度等我俾返錢你，佢隨即笑笑口話唔駛，跟住行咗去，我係後面好遠大聲話唔該晒，佢冇擰轉頭搖搖手繼續行咗去，30幾年後依家仲記得。

•多年前一包煙仲係$60，有一晚懶到唔想行，開飛的app搵的士司機，備注訊息填上：幫我買包黑萬來我樓下，我給你$100。點知真係有司機肯接，最後成功交收，事後感覺很神奇

•我試過有次無帶銀包出門，諗住都係用八達通無所謂，點知一上個綠Van司機話八達通機壞咗，我講咗句唔好意思，轉身諗住落車，
佢問我係咪冇散銀，我同佢講係冇帶銀包，佢叫我坐低，話請我，
準備落雨，你兩手空空我車你出去。勁感動。

•我試過趕時間，但身上得張500蚊。我都知衰，截車時喺車門同司機講「唔好意思，我得張500蚊冇散紙，你有冇得找？」個司機話「得啦，上車啦！」。到我要中途落車時，俾張500蚊，司機開門好型咁話「冇得找呀，得啦！」。

•中學有次坐車唔記得帶銀包返學，嗰陣電子支付仲未流通安裝，有個EE（姨姨）同班車上撞到佢，成個書包差唔多摷勻都搵唔到Cash，個姨姨就行過嚟就話我俾你$20啦，我問點俾返佢電子支付，佢話唔使啦下次見到再俾返。大概過咗一個月咗右先喺同班車次（再見）姨姨，行過去俾返佢嗰陣佢話唔使啦，覺得真係好Warm（溫暖）。

•有次我坐低咗先發現得100蚊紙喺銀包，咁我問坐前面個靚女有冇散紙同我唱啦，跟手佢俾咗啲銀仔話請我，人美心善就係呢啲。

•我好印象深刻中學時自己搭小巴出去，上到車先發現八達通冇錢，又冇散字，諗住落車嘅時候，有個叔叔幫我俾埋，仲俾多$10我驚我冇錢返屋企。

•我今日旺角搭觀塘紅Van，只收現金，問司機有冇得找，佢話：冇喎，是但啦你有幾多俾幾多，爭少少由佢，結果將成身嘅散子俾晒佢就坐低咗。

•我都試過多年前有一次上車想俾錢先發覺無帶銀包，以前八達通都係放喺銀包，所以乜都無喺身。即刻同司機講唔好意思我唔記得帶錢，諗住一定俾人趕落車，點知司機叫我下次俾返就OK，嗰下係幾感動。

資料來源：matthewwth＠Threads

有時做好人就是這麼簡單，自己開心，他人又快樂。一名壓力山大的港男早前乘搭小巴時，遇上一位超級有禮司機。就是因為在車上聽到的4句對答，情緒價值拉滿，巨大的壓力得以在短短10分鐘內撫平，「成個人精神爽利晒」，「功效」神奇。詳情見下圖及下文：