公屋夫婦月入共5萬請兩個工人呻悲哀？男戶主：月儲4位數字買樓無望網民嘲無病呻吟｜Juicy叮

更新時間：15:44 2025-06-21 HKT
發佈時間：15:44 2025-06-21 HKT

有夫婦二人月入共約5萬元的公屋戶大呻「住公屋請兩個工人是否悲哀？」，同時抖出家庭開支明細，慨嘆儲錢難置業無望，但「苦況」未獲大部分網民同情，反而被指是無病呻吟，促請「交返間屋出嚟」，不過還是有人明白樓主面對的財政壓力，留言力撐。詳情見下圖及下文：

公屋夫婦月入5萬請兩個工人呻悲哀？男戶主：月儲4位數字買樓無望逐張睇↓↓↓↓

男戶主呻：邊有可能買到樓

有關的男戶主昨日（20日）在社交平台Threads以「住公屋請兩個工人是否悲哀？兩夫婦月入$50K（5萬元）左右」為題發帖，放上長文大呻：

「一個（工人）喺阿媽屋企（公屋單位）照顧佢一個，阿媽行得唔好照顧唔到自己，焗請，個工人$5000個月，交租$3000個月。

另一個（工人）喺我屋企（另一間公屋單位）照顧我兩公婆（妻子在職）同小朋友，工人$5000，交租$3500，俾老婆屋企家用$4000，每個月得返$29000可以用。

但係因為請工人搞到成家都好似巨嬰咁乜都有人服侍，但唔請工人又唔得，一個人做嘢又養唔到咁多人，小朋友開支又大，而家每個月儲得$6000-$7000，邊有可能買到樓。

之後又話富戶要交2.5倍租，只要大家都加幾百蚊人工就超過3人家庭$50201要交倍半租個限額（編按：詳情見下圖↓↓↓↓），到時就更加唔使諗買樓，即係我註定要成世住公屋」。

公屋富戶入息及資產限額。網上截圖

網民不同情指無病呻吟

男戶主雖然呻到樹葉都落，但不少網民可不同情，認為是無病呻吟，回應的大都提供各自不同情況反駁：

•其實好多人要請工人照顧獨居老人家，然後自己無工人用，無公屋住要租樓，兼要返工同照顧自己屋企，你屋企真幸福。

•大把人兩公婆加埋得兩萬一家3口要租私樓啦。你已經有公屋仲Ｘ乜？你唔想一世住公屋你一係搵多啲錢，一係咪生，智慧有限。

•你有無諗過仲有一班係買唔起私樓，住唔到公屋班人？？每個月租金萬幾蚊，每個月扣晒燈油火蠟剩少少。咁你仲想點？？？

•既然你咁唔想住公屋，咁交返間屋出嚟自己出去租屋住啦。有大把月入比你哋低嘅家庭更需要間屋，九唔Ｘ搭八，身在福中不知福。

•我同事兩公婆夾埋都係$32k左右，住私樓仲供緊每月$11K，小朋友仲讀緊書。你有工人用，有錢儲，有好多人恨住嘅公屋住，好心你唔好喺度曬命啦！

•請問你有幾慘？？我朋友自己一個女仔月薪25K都無，要交租，佢媽咪因為中風要請工人照顧，每月睇中醫，同尿片嘅無底深淵，仲有屋企其他雜費，你慘？？大把人慘過你。

•覺得自己好慘嘅話，交返自己間公屋出嚟，然後租私樓住，到時就可以完全體驗到咩叫「兩頭唔到岸」，然後就學會感恩有公屋住緊，明白其實俾幾千蚊租夠一家三口+工人住，仲要每月有錢儲，真係好幸福。

•有工人湊小朋友，工人又可以做埋家務，兩公婆返屋企咩都唔使做，仲可以住公屋交幾千蚊租。難為嗰啲又要供樓，無工人、無長老，兩公婆要返工，放工仲要湊小朋友同做家務。你呢啲無病呻吟係咩玩法，做人要知足喎……

•大把人工唔夠低又唔係真係搵得多嘅人焗住要出去租私樓，個個月死慳死抵先夠為皮。計晒租同家用仲有兩萬九已經好多，唔知你嘈啲乜。無人欠咗你嘅，香港最難解決嘅房屋問題都已經比你搞掂咗，你仲想點？免費比你住埋好無？一係你咁唔滿意唔好住囉。

網民不同建議助解困

說著，有好心的網民作出不同建議助樓主解困，樓主也在回應欄積極回應：

•網民：接埋阿媽一齊住，起碼慳返一份租，加咗老人公屋入息上限又可以提高，唯一缺點，婆媳糾紛。
•網民：咁你同呀媽一齊住，申請個大啲單位，可以減少啲租，又用少個工人。變咗4人家庭，咁就唔超啦。你有兩個公屋單位喺手，用綠表都好易，一啲都唔悲哀，仲要感恩有公屋住。
•男戶主：有頭髮邊個想做熾哥呢，你出去問下邊個女人會想同奶奶一齊住，個工人服侍我阿媽一個已經夠多嘢做，邊有可能仲照顧多兩大一細。

•網民：老人家要工人照顧我明，自己屋企都要工人？自己做埋家務咪儲到錢。
•男戶主：無四大長老幫手就要請工人湊㗎啦，唔係返咗工邊個湊？

•網民：幸福，有2個工人，有小朋友都仲儲到家庭收入12-14%，唔差㗎！要向上流除非你哋是但一個搵多一倍人工（3萬變6萬）。
•男戶主：而家小朋友仲好細個就儲到錢，到之後讀小學都唔知仲剩到幾多。