柴灣94歲婆婆被斷水斷電 每日被迫流浪街頭12小時 記者家訪驚揭另有內情｜Juicy叮

柴灣一位94歲獨居婆婆，向HOY TV節目《一線搜查》投訴所住公屋單位被斷水斷電，她被迫每日流浪街頭12小時，晚上到公廁梳洗，婆婆指有人要迫她去住老人院，不過當傳媒家訪時，卻被眼前景況嚇呆，揭開事件的另一內情。

投訴被斷水斷電 婆婆每日流浪街頭12小時｜貼身直擊↓↓↓↓

HOY TV節目《一線搜查》早前一集，報道柴灣一名94歲徐姓獨居婆婆的流浪街頭情況，婆婆無兒無女，丈夫已在20多年前去世。

報道引述徐婆婆表示，有人要迫她住老人院，數年前自己的公屋單位被人截水截電，使她每天朝六晚六都要在街上遊蕩，雖現住在柴灣一間公屋，但有家歸不得，一天三餐，大小二便，甚至洗澡抹身，都要在街上完成，這種情況已有三年。

「我話死啦咁點算呀 我就喊...」

徐婆婆在節目中講述所居的柴灣公屋單位被斷水斷電時的情況：「（佢話）我個老公死咗咁耐，唔去老人院呀，你信唔信我cut你啲電呀，就係咁樣cut晒我啲電。」

婆婆指，斷她水電的人發現她有安裝平安鐘，「佢話，吓，你有平安鐘電話呀，咁我畀返一盞燈嘅電你呀。」

當時婆婆見被斷水電，非常驚慌：「我話死啦，咁點算呀，我就喊，我一路講，一路喊。」

3年前起 朝6晚6在街遊蕩

有不少柴灣街坊都聽過婆婆親述被斷水電的故事，街坊都知婆婆話，有人想用截水截電的方法，迫她進老人院。

於是由三年前開始，婆婆每日早上6時會出門，一直在街遊蕩到傍晚6時才回家。

節目中記者查看徐婆婆身上揹著的一身家當，發現當中包括一包包的藥丸與及兩件衫，另外還有一盒街坊給她的食物，便沒有其他。

「我晚晚要去廁所洗嘢」

「唔經唔覺，（斷水斷電）都有三、四年，我依家晚晚沖涼、梳洗都會去廁所（公廁）。落雨就無去，如果唔係我晚晚要去廁所洗嘢。」

婆婆在節目中向記者透露目前情況：「食用，就去茶樓囉，唔記得（去茶樓），就返嚟買（食物），買水啦，買礦泉水囉。」

「無人幫我，咁你叫我點樣呀？」

「唔方便你都要方便㗎，依家又無人無物，又無人幫我，咁你叫我點樣呀？」

她表示不擔心食用，只要有水飲，她捱餓三、四日都可以。

有無向房屋署求助？她向記者搖一搖手，「佢個人都唔見你添呀，（因為）疫情唔見你。」

造訪婆婆公屋家 眼前景象竟然係咁↓↓↓↓

記者家訪嚇一跳

記者隨後到訪婆婆家中，視察實況，不過到達婆婆家時，卻被眼前景況嚇了一跳。

原來婆婆家中堆滿雜物，雜物更已堆至門口，現在婆婆的家滿是雜物，婆婆說：「我依家無鎖門，只係拉埋鐵閘。」

記者發現屋內雖無異味，亦見不到有曱甴老鼠，但雜物填滿整間屋，連出入都有困難。

婆婆家中無水電？

婆婆投訴家中被人截水截電，是否真有其事？她有否進入家中確認？「我開過水喉，無（水）！」婆婆斬釘截鐵地說。

但有無電呢？婆婆家中有個簇新的雪櫃，「個雪櫃我無開過，唔知有無電。」「我被電電過，我怕，我唔敢郁嗰啲電。」

「老公買落唔捨得呀...」

丈夫過身後，她才瘋狂儲物，「咁耐有感情嘅嘛，老公買落，到依家，我真係唔敢浪費一樣嘢。」「我就係唔捨得屋企啲物品，唔想丟棄。」

婆婆說她曾試過執拾，「我一個人搬唔郁，咪由佢囉。」「人家薄弱，又無人幫手，咁你一個人跳得幾多吓呢，跳跳吓，隻腳唔掂㗎嘛，咁咪情願唔執囉。」

記者從婆婆談話內容，估計她的丈夫過世已超過二十年。

「去老人院坐死監啊」

婆婆口中指有人迫她去住老人院，無兒無女的她，為什麼她這麼抗拒住老人院？「去老人院仲咩啫？我依家走得食得，去老人院，坐死監啊。」

「（係老人院）郁都無得郁嘅，畀條尿片你......無人理你。」婆婆強調目前唯一心願是不進老人院。

這二十多年來，婆婆獨自生活，每個月靠4千多元長者生活津貼過日，平日除早市到茶樓吃飯，一星期有六日會到教會取免費飯盒，生活艱難但知足。

被斷水斷電？迫住老人院？柴灣流浪婆婆事件真相原來係...↓↓↓↓

立法會議員曾收求助：婆婆思路清晰

立法會議員郭偉強設在婆婆居住公屋的辦事處，在三年前曾收到婆婆的求助。

郭偉強在節目中表示，其實婆婆居住的單位一直都有水電，並無被人截斷，「可能婆婆嘅記憶停留係某個時間，其實(婆婆單位)水電一直都有。」

郭偉強指，他辦事處同事曾到訪婆婆單位，單位暫未有臭味，亦未有直接構成很嚴重的衛生問題。

他又表示，很多街坊由於聽了婆婆說被人丟了很多東西，於是送了很多物資給她，然後她又用不完，所以一直囤積。

他指出，婆婆思路清晰，可以通過溝通，引導她處理家中雜物堆積的問題。

老人科醫生斷診 婆婆其實有呢個病...↓↓↓↓

醫生：佢依家生活都幾苦

老人科專科醫生佘達明在節目中表示，徐婆婆明顯有認知障礙的問題，患者會自己堆砌一些情節出來，妄想被人迫害。

佘醫生說：「認知障礙症嘅病人，講嘢無問題，不過所講嘅，可能全部係虛構。」

他指出，病人還有負面思想，「驚人對佢唔好，或者驚政府對付佢，再加上無記性，編砌咗好多嘢出來，好似被人逼害。」

這類病人總覺得缺乏一些東西，因此會在家囤積雜物。

「你(情況)唔夠差 就無人畀錢」

佘醫生指出，婆婆目前的生活，全無質素可言，非常令人心痛。

「佢依家生活都幾苦，佢係焦慮裡面生活，成日擔心cut水cut電。」

「你要夠病啦，例如中風、撞車斷咗隻腳、斷手，政府先嚟醫你，資源係擺到最後，你唔夠差呢，就無人畀錢，你要夠差先畀錢，政府依家就係咁，但我哋醫生就覺得好差。」

他認為婆婆需要更完善的社區支援，每兩星期或每個月見一次家庭醫生，但目前只每四個月到公立醫院覆診不足夠，應聯絡鄰近社會福利機構或鄰舍組織去協助她。

社署已派社工跟進

房屋署在回覆該節目查詢時表示，署方曾於2020年接獲涉事單位下層廁所天花滲水的投訴，屋邨辦事處發現涉事單位廁所地台滲水，由於有雜物擺放，維修工人未能在廁所進行維修工程。

在聯絡社福機構相關社工及得到涉事單位戶主同意的情況下，辦事處安排清潔工人協助她將部分雜物搬到室外暫存。

在完成維修工程後，辦事處已在當日將有關物品交回戶主搬回室內。

社會福利署則表示，轄下綜合家庭服務中心社工去年11月曾接觸徐婆婆，當時她表示未有福利需要，但署方知道她的近況後，已經再派社工跟進，會提供適切的協助。

----

《星島申訴王》100集誕生之我最喜愛影片票選，由6月16日至6月30日，玩遊戲贏取總值超過10萬豐富禮品！

立刻點擊投票👉🏻https://tinyurl.com/38dfzwtv

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ