的士疑違法拒收電子支付？豪氣的士佬揚言唔收錢：白做咪白做 乘客落車結局大反轉..
發佈時間：16:11 2026-09-16 HKT
本港的士司機的服務態度一向備受關注及引起爭議，最近有港人乘搭的士時發現司機未有提供電子支付方式，好心提醒或違反法例，又好奇如客人身上現金不足會如何處理，獲司機豪氣神留1句。而當她下車時湊夠身上所有現金支付車費時，司機突變臉大罵「冇錢就唔好學人出街，幾十蚊都冇」，後來更發展至雙方互相「問候」，令她深感不忿：「已經犯法仲咁惡鬧客人！」帖文引起網民共鳴，直言司機不知所謂，本港法例亦就的士支付方式有明文規定，即睇下文了解！
的士乘客現金不足欲電子支付不果 獲司機1句豪氣回覆最後竟變臉？
近年電子支付如信用卡、支付寶或二維碼付款越來越普及，市民外出時未必會攜帶足夠現金。現時，多種公共交通工具亦增設電子支付方式，就連過往只收現金的的士亦陸續安裝有關裝置。有港女於網上社交平台發文，表示最近搭的士時詢問司機接受哪種電子支付，豈料司機以沒有安裝裝置為由拒絕，「乜支付都唔收，一樣都冇，只收現金」。樓主隨後好心提醒司機，政府就的士司機須提供電子支付方式已立法，更提到如自己身上現金不足該如何是好，司機豪氣回應：「咁咪由佢囉！白做咪白做，鬼叫你冇啊！」
樓主到達目的地時車資為$54.2，惟她身上只餘下$40紙幣，「左搵右搵啲袋，數埋晒啲所有散銀，最後叫做啱啱夠」。然而，原先豪氣回覆「咁咪由佢囉」的司機於事主付款下車時即變臉大罵，直斥樓主：「冇錢就唔好學人出街，幾十蚊都冇」。樓主對其指罵深感不忿，認為的士司機本應提供電子支付，「本身司機好豪氣話唔收錢，但係點樣搵散銀，最後我都係比咗現金你，你的士完全冇任何電子支付已經係犯法，仲咁惡鬧客人！」
網民嘆：多年無搭的士就係唔想受氣
帖文引起一眾網民共鳴，批評的士司機的服務態度，慨嘆少搭的士全為不想受氣，「所以依家非必要盡可能都唔會想搭的士」、「舊款4座（位）好多都老鬼都係垃圾不知所謂」，建議樓主下次可選擇「小露寶」車款，「後生仔多好好禮貌，唔係一竹篙打沉一船人，不過樹大一定有枯枝！」
有同為的士司機的網民則提醒樓主當時可表示轉至警署，「一講呢句佢哋就笠水，自己都係揸的士但一樣好憎堆的伯」；也有網友認為樓主下次可於上車前詢問，「上車前問清楚，冇就搭過下一架算」、「唔明點解宜家的士可以明目張膽寫住只收現金，寫在前排座位後面，我坐5次有遇到4次」。
法例規定的士須提供電子支付
根據第374D章《道路交通(公共服務車輛)規例》第47A條規定，由2026年4月1日起，所有的士司機必須提供至少兩種電子繳費媒介，包括一種二維碼電子繳費媒介（如支付寶、微信支付或BoC Pay）和一種非維碼電子繳費媒介（如八達通、信用卡或FPS）。司機可按營運需要靈活選擇電子繳費媒介，並在車窗指定位置張貼貼紙展示所提供的電子繳費媒介，方便乘客識別。市場上有電子繳費平台（如八達通流動收款機）支援多種支付方式，有助司機符合法例要求。如司機沒有合理辯解即屬犯罪，違者最高罰$5,000及監禁6個月。
文:RY
延伸閱讀：$583天價的士！內地客山頂call車落中環慘被劏 揭無良司機1古惑招數 結局神反轉......
