執咗幾個撥水靚B | 曾智華
發佈時間:06:00 2026-11-10 HKT
馬經版老友名言——我貼得出,當然自己買!小弟也如是,並非期期會提供投資項目,但凡提供,個人必定率先「小注怡情」。
兩期前,本欄標題為「你亂潑水我執靚B」,為引證分析,我當日就買入少少(唔好問即係幾多!),三隻文中提及的股份:(一)騰訊(700);(二)阿里巴巴(9988)及(三)寧德時代(3750),買入價分別為386元、97元及350元。
金融市場千變萬化,影響股價因素眾多,無人可以完全掌握。我能做的,只是根據常識及過去經驗作判斷,然後決定揸或沽。
大部分時間按兵不動,寧放過不殺錯。兩周前,發覺以上三隻基於短期因素,向下調整有點過籠,若買入作中長線投資,幾可肯定不會大蝕,因全部是經過長期考驗的公司,最重要是能配合中國戰略性發展,當然有國家政策傾斜支持。
沒料到,上周四失驚無神,美國中期選舉結果石破天驚,因侵侵過去兩年的胡作非為,搞到平民百姓生活苦不堪言(大富豪則賺到肥過肥豬),怨氣沖天,Enough is enough,用手上一票表態,搞到共和黨輸到瞓街,連本來「深紅」(共和黨死忠)的州份,不少亦變「藍」(改為支持民主黨)。
這就可以解釋,特朗普過去兩年的種種行為,幾咁乞盡大部分美國人憎,包括本來誓死支持佢的「侵粉」,明顯不少也心碎。這個結果,反射落經濟,神奇地股市第一日大升,但翌日又即狂插,好似食錯精神科藥物,市場人人手足無措,一時過度興奮,一時過度頹喪,無法搞清點行落去。
上周四的港股也跟着爆升,我執到的三個「靚B」,全升一成以上,相當夢幻。
民主黨回朝將令AI政策大變
當然,我知道這並不一定是百分百「真勢」,可能內藏有不少虛火。但既然認定三隻B是靚B,咁就決定唔收割,養吓佢先,等到肥肥白白再決定未遲,絕不急。走筆至此,順帶一提,若美國民主黨回朝,將令AI政策有頗大改變,揸咗的,自己執生喇!
資深傳媒人 曾智華

















