慢讀樂趣｜點解學校無教過情緒科生活化故事助解困

更新時間：17:38 2021-12-06 HKT
發佈時間：03:00 2021-10-05 HKT

　　《點解學校無教過情緒科》作者是執業臨牀心理學家，2020年開始活躍於社交媒體，把治療中學到的理論道理與大眾分享。「覺得本土還是需要本土式的心理資訊，明明香港人才濟濟，誰說心靈雞湯一定要看翻譯本？」
　　香港有很多「雞湯書」，不過大部分是偏向教你如何成功，做一個有錢人，例如你想成為少年巴菲特，OK，我教你從地下拾到一枚五美分開始，千祈咪跣手，然後你要利用呢個硬幣，開始你的投資，通過複利率的神奇方程式，你就可以好快賺到第一桶金……講呢啲？無錯，香港就係最緊要講呢啲，至於學生情緒問題，唔係好重要。
　　難得作者做有心人，為一眾子弟解開心理問題，還要好貼地用口語化文筆，講生活化故事，毫無教科書式陳述，大家好似課餘傾偈交流一樣，好Easy。作者說︰「這絕對不是一本通書，亦不是看完就能保你好人一生情緒平安。只是作為一個引子，去講情緒調節、人際關係的101。如果大家都懂得處理自己的情緒多一點，就算這個社會再風雨飄搖也好，也許都會和諧一點，快樂一點。」
　　好了，我抓到本書的關鍵詞，甚麼是「社會風雨飄搖」？於是令我有馬上一口氣讀完這本書的衝動。本書共分四大部分︰一、情緒調節101；二、阿爸阿媽沒有告訴你的事；三、人際關係必修課；四、亂世中的生存之道。
　　前三個部分是熱身，我用自身經驗逐Part跟大家分享。首先，學校真的沒有教過情緒科，我的年代是傳統學校時代，即是教大家守規矩，上堂要有紀律，有問題先舉手，然後由老師指點，當時香港正在進入大都會時代，讀好書，搵好工，賺到錢就要學巴菲特。你話呢種教育方式好不好？我話，幾好呀，不過老師好似無乜強調︰自律即自由。所以我只是謹記學校訓示，唔好出位，唔好反叛，但沒有明白，原來你要爭取更大自由，先要自律呢個大道理，所以當年讀到高中就覺得難以理解，點解學校管得那麼嚴，從而令我及大部分同學心有不甘，好想反叛一下！
　　阿爸和阿媽重複告訴我的事，就是要考好成績，唔好留班，一來羞家，二來又要白白畀多一年學費，阿爸有次好嚴肅同我講︰「遲一年出身，你知搵少幾多錢？」阿爸、阿媽話︰「你唔孝順都唔緊要，你一定要為自己前途奮鬥，唔好輸畀人，唔係第二日就無得買車、買樓，同娶老婆。」
　　不過，雙親絕少跟我分享幾時應該拍拖，同埋點樣拍拖之事，我好似淨係記得阿媽話︰「最好讀到大學畢業先至搵對象，最好係大學同學啦。」爸媽關於戀愛問題是好有心得，之不過沒有與我分享。他們最鍾意就是睇完大台電視劇，雞啄不斷的指點劇中男女主角的關係，應該點點點，嗱，咁咪就好囉。對唔住，我沒搭嘴，因為不是我杯茶，我寧願放學睇《430穿梭機》，因為有周星馳。
　　我的學生時代，當然無人際關係必修課，我只係記得中三歷史老師教三國時代，講過一些關於劉備同曹操之鬥法事迹，老師話︰「曹操係公關高手，懂得籠絡人心，不過，劉備亦工於心計，當着曹操面前做場戲，扮弱者，於是逃過一劫。」老師教大家︰「出嚟做事，都係低調啲好，叻唔切就會有楊修之下場。」以上算唔算人際關係課呢？
　　最後，是本書之戲肉，講到過去兩年香港經歷不平凡的日子，作者話呢個風雨飄搖之時代，如何在亂世中看顧自己情緒，真是學問中的學問，何解？因為好多人就係唔明一樣嘢︰覺悟！如果你覺今是而昨非，恭喜你，因為你實迷途其未遠也。
　　之不過，你對不可追之昨日之日，依然堅持的話，我可以告訴你，沒有一碗心靈雞湯可以安撫你。請你不要把負面感情長久留下心中，世界有很多道理是需要時間同智慧的增長，方可以解脫。長遠而言，社會只會愈來愈進步，我們要學會不走回頭路，這個社會明天便會更好。你說這是最壞的時代，也是最好的時代，至少啱咗一大半，希望大家從今日起調整好心情，這個社會最需要的是一顆顆健康而有希望的心，年輕人尤其如是。
　　《點解學校無教過情緒科》
　　作者：崖柏
　　出版：亮光文化
　　售價：$118
　　　　