中秋做節酒樓送「飄雪」？食客全身上下黐滿白點崩潰 經理徹查揭尷尬真相
發佈時間：16:24 2026-09-21 HKT
中秋佳節是一家人團聚「做節」的好日子，然而有市民在酒樓聚餐時，竟離奇遇上室內「人造雪景」！一名網民日前在社交平台發文控訴，指一家人前往黃大仙現崇山彩晶軒慶祝中秋，吃到一半赫見全身上下黏滿一點點白色碎屑，連地氈及餐桌亦無一倖免，怒斥：「無下次！香港飲食業真係多謝你！」事件引發網民熱議，涉事酒樓經理隨後接受《星島頭條》查詢時連番致歉，並親自揭開這場「飄雪」的尷尬真相。
黃大仙酒樓做節驚變全身白點？ 褲管地氈滿布碎屑
事主在 Facebook 群組「黃大仙區友」發文透露，一家人於星期四晚（17日）前往黃大仙彩晶軒做節。用餐途中，家人突然發現其中一人「成身成褲白色一點點」，起初還開玩笑以為是洗衫時忘記取出紙巾所致。豈料仔細觀察下，身邊所有家人身上竟全都同樣有白色碎屑，再看地上亦散落滿地，甚至白色枱布上也有白點。
從事主上載的數張現場相片可見，受影響食客穿著的深色長褲及衣物上，黏附了不少細碎的白色纖維，遠看猶如嚴重頭皮屑或撕碎的紙巾屑；深色地氈與餐桌表面亦清晰可見散落的白色點點，極度影響食慾。事主當時懷疑是冷氣機出風口或吊燈掉落不明灰塵，要求關閉冷氣，但不久後職員未經詢問又重開，令事主憂心「食緊嘢咪食晒啲塵？！」
投訴遭冷待 食客不滿職員「態度惡頂」
更令事主氣憤的是酒樓職員的處理態度。事主指初時向部長反映，對方表現冷淡且不發一言，既不道歉亦拒絕換枱；幾經交涉要求經理介入，涉事的湯姓經理態度同樣消極，甚至質疑事主：「一路講無理由、無可能，唔通我哋做節貪過癮帶入嚟？」事主最終幾經爭執才獲安排換枱，惟席間目睹推出來的收碟車極為髒亂，直言「睇到都冇胃口」，批評前線服務態度令人難以接受。
網民嘲「人造雪景」 酒樓經理致歉揭外判洗衣出事
帖文曝光後引發網民熱烈討論。有網民語帶諷刺笑稱是「人造雪景…製造氣氛，冇收你錢，算係咁」、「似係上面嗰啲裝飾甩出嚟」；亦有精明網民猜測：「估計係黐喺枱布上面啲紙巾碎，洗枱布洗得唔乾淨」。不少人則對服務態度表示無奈：「坦白講香港飲食業服務不嬲差」、「報咗食環未？」
《星島頭條》就事件向涉事酒樓查詢，張經理解釋指他們已徹查事件，發現問題根源在於外判洗枱布公司的工序出錯，清洗過程中有紙巾黏附在枱布上；由於枱布與紙巾同為白色，員工鋪枱時一時未察覺底部藏有紙巾碎屑。當垂下的長枱布摩擦觸碰食客衣物，加上拍打，紙屑便散落全身及地氈。
張經理在查詢中多番強調「真係唔好意思」，並表示已嚴正督促外判洗衣商改善。為徹底解決隱患，酒樓決定於中秋過後全面更換一批深色新枱布，確保日後若有異物附著能即時察覺，杜絕同類事件再度發生。
圖片及資料來源：黃大仙區友@Facebook
同場加映：「絕世好老闆」體貼失業新手爸！西環手打魚蛋名店開工即派大利是 包伙食兼畀$200買外賣
