茶記港式奶茶風味大不如前？港人嘆「完全冇濃郁嘅味道」惹網民熱議：而家要將貨就價
發佈時間：11:00 2026-09-12 HKT
港式奶茶作為本港代表性的飲食文化，其獨特風味一直深受市民喜愛，惟近年產品質素頻頻引發關注。有港人近日於網上發文，指近年於茶餐廳享用奶茶時，發覺味道大不如前，「完全係冇咗濃郁嘅味道。」隨即引發網上熱議茶味變淡原因，有網民認為有餐廳為慳成本轉用質素參差的茶葉，亦有人認為有功架的師傅越來越少：「而家已經見唔到有師傅拉高個茶壺撞茶，咁點會有茶味。」
港式奶茶茶味變淡？港人熱議：而家要將貨就價
最近有網民於Facebook群組「香港茶餐廳及美食關注組」發文，發覺近年茶餐廳奶茶「跟以前唔一樣」，直言現時的奶茶「完全係冇咗濃郁嘅味道。」於是於網上向網民請教「咩原因？」
帖文隨即引發網上熱議，有網民認為有餐廳為控制成本而將貨就價，轉用質素參差的茶葉：「茶葉唔靚，慳成本」、「以前真正用錫蘭茶葉。而家將貨就價。混咗其他國家牌子的茶葉」、「水滾茶靚，茶葉唔得已經係先決條件」、「氣候變化太嚴重，茶種質素有所下降，就算種茶技術進步，不足以彌補相差影響。」
亦有人認為淡奶的選用亦是關鍵，有網民坦言「少茶多奶，仲要唔係黑白淡奶」、「奶，因為黑白奶貴轉用晒平價野，已經差好遠。所以我見間餐廳用黑白奶都會多啲幫襯」、「以前啲師傅會將啲茶葉兩溝三溝，會用兩至三種茶葉，例如紅茶會溝少許香片或者鐵觀音的奶茶味道特別香濃，同埋以前真係用全脂淡奶，而家只係用合成淡奶，有啲餐廳用黑白淡奶成本貴咗都算有良心，而家啲後生開嘅餐廳淨係用紅茶嚟沖。」有人指出有茶記轉用預製奶茶咖啡：「我試過在茶餐廳食早餐想叫杯鴛鴦，伙記話無鴛鴦，但我問有奶茶有咖啡點解無鴛鴦，佢只識講話佢哋無，後來我去水吧偷望吓，原來間茶餐廳係用預製奶茶咖啡（即係廢水），所以無鴛鴦賣。」
網民：而家已經見唔到有師傅拉高個茶壺撞茶
有熟悉行情的網民指出技術斷層問題，指「識做嘅無做，近幾年入行做兩做又自稱師傅，餐廳又要平，攞貨返黎溝好晒，連最基本用六種茶葉溝出黎，變咗淨係用粗中幼三種茶葉，死得！」、「而家已經見唔到有師傅拉高個茶壺撞茶，只係壺過壺兩三次，十分鐘唔洗就搞掂一壺茶膽，咁點會有茶味」，加上「貪快大火煲」，導致茶味大減。
有網民笑言味覺屬於個人生理變化，笑言「有機會係你味覺退化咗。等於上一輩永遠覺得而家啲嘢唔好食」「年紀大，味覺退化。」有人則認為食客面對質素欠佳的店家，最直接的做法就是「下次你唔使再搵佢得㗎啦。」
文：M
延伸閱讀：3大人氣清湯腩比併 網民力讚 秘方炮製限量牛腩部位 傳承清湯腩/新花清湯腩餃子專門店/道生麵館
