吳卓羲親述三大擇偶條件爆初出道拍劇7日冇瞓狂NG 崩潰向阿媽爆喊一句話起死回生

更新時間：13:00 2026-10-29 HKT
發佈時間：13:00 2026-10-29 HKT

吳卓羲（Ron）近日接受資深傳媒人查小欣的網上節目《紅查館》專訪，大方回應與張曦雯因合作TVB台慶劇《璀璨之城》而傳出的緋聞，而在最新一集訪問中，身為圈中「黃金單身漢」的吳卓羲進一步剖白擇偶條件與婚姻觀，坦言揀老婆最緊要溝通與心靈扶持：「娶老婆你梗係想……要靚啦，要溫柔。當然要溝通到，心靈上大家可以扶持下。另外要有共同嗜好啦，例如睇戲、影相。」被問到會否考慮閃婚，他即斬釘截鐵拒絕：「我唔會（閃婚）啦。我無設定自己幾多歲要結婚，隨緣啦。人生工作都咁大壓力，呢啲嘢唔好畀咁多壓力自己，刻意去搵亦未必有。」

吳卓羲7日冇瞓爆喊想唔撈

談及演藝工作壓力，吳卓羲在訪問中重提初出道時搏命拍劇的辛酸史，自爆最高紀錄試過連續「七日六夜」冇瞓覺：「你做唔做？唔做大把人做。當時人清醒嗎？不清醒。點記對白？記唔到，NG到飛起。」他憶述當年剃頭著清裝與劉松仁合拍古裝劇《英雄．刀．少年》演師徒，捱到第7日最後一日要應付兩頁紙對白，結果精神透支狂食螺絲：「一開始搞一輪動作，跟住講對白。第一次，講咗兩句就NG；第二次，第一句就NG；第三次，第一個字我就NG！我頂唔順，我同導演講：『導演，我真係搞唔掂，我不如收工啦。』導演話：『唔得喎，聽日唔係呢個景。』最後夾硬挨住、逐個逐個字去拍。」他更坦言當年曾辛苦到在偏遠外景場地爆喊，打電話向媽媽哭訴想放棄幕前工作：「打電話畀我媽媽。喊，係啊，喊。我話我唔想做，我話好辛苦。跟住我媽媽同我一齊喊，佢話：『你身為一個男人，你唔做都要拍埋呢部。』我好記得呢一句說話，講完之後，我就堅持落去。」

吳卓羲拍劇喊足一日體力透支

吳卓羲除了體力透支，亦直言拍喊戲同樣令他承受沉重心理壓力，更點名與鍾嘉欣合作的《缺宅男女》時，有一場喊戲最為煎熬：「你要點樣喊得好睇，同埋喊得有戲。你喊得唔好睇，其實觀眾會出咗去，但你又要保持個樣，但你要有嗰種戲喺度，係一個學問。」他憶述當時全天候陷入崩潰情緒之中：「唔係剩係流眼淚，係崩潰喊。天崩地裂咁，好攰、身心疲累。我同阿鍾嘉欣由頭到尾都係喺度，你又喊我又喊，好苦咁樣。一場戲比一場戲辛苦，坐喺天橋底又崩潰喊，喺碼頭接受唔到一啲嘢又喊。呢啲崩潰嘅喊其實係好攰。」

吳卓羲片場遇靈異事件

入行多年經常親身上陣拍動作戲，亦令吳卓羲換來周身傷患，他苦笑細數全身舊患：「手呢啲打到筋膜炎，腳全部都彎彎地。」提到早年與好兄弟林峯合拍經典劇《大唐雙龍傳》，兩人更是一起經歷中暑、流血意外甚至片場「俾鬼壓」奇遇：「好似拍戲中暑、拍打又受傷，落水呀、吊威亞都好多意外發生。」至於拍劇有否遇過靈異事件，他坦言當年等埋位時試過清醒狀態下動彈不得：「拍《大唐雙龍傳》有試過，我同阿峯（林峯）等緊埋位，我見到佢同我講嘢，但我動彈不得，可能係太攰。我哋已經做足晒所有禮貌嘅嘢，好似裝香啦，去廁所都好有禮貌。」吳卓羲由TVB起步，到返回內地拍劇，至今已成為一位獨當一面的演員。