Coffee林芊妤揭童年陰影被家人貼「低能」標籤：覺得我冇得救爆蘭桂坊「跪街」真相

更新時間：14:29 2026-10-03 HKT
發佈時間：14:29 2026-10-03 HKT

「瑜伽達人」林芊妤（Coffee）於2018年與圈外人翟志榮結婚，誕下大仔翟德彥（彥彥）及細女翟允兒後，一直努力兼顧家庭與事業。她不但榮升百萬YouTuber，成為香港最吸金的KOL，更創立自家品牌，曾透露品牌至今已累計投資近8位數字。

Coffee童年遭標籤「冇得救」

近日林芊妤接受方健儀的YouTube節目《女人方言》訪問，揭開幸福背後的辛酸。她坦言：「其實我成個小朋友嘅時期已經係好苦，由細到大都讀唔到書，屋企人覺得我係低能、覺得我冇得救，搞到我畀咗好多標籤自己。」

林芊妤出身於福建家庭，小時候從內地來港生活，一家人曾擠在百多呎的公屋單位，同住的還有祖父母和姑姐。由於家庭極度重男輕女，她形容自己猶如「妹仔」：「我哋屋企唔係有錢，由細到大喺福建人家庭長大，屋企好重男輕女，所以我由細到大都係一個妹仔。所以入到TVB嘅時候，我習慣性將自己睇到好低。嗰陣好容易陷咗入一種『唔想去擦鞋』嘅心態，因為我唔想畀人覺得我擦鞋，所以我唔會主動同監製講嘢。因為階級觀念，我將自己擺得太低，唔肯去接觸上面嘅人，有呢種自卑，覺得自己永遠都係喺下面。」

Coffee父親藤條逼書留班慣性服務哥哥

林芊妤回憶，父母因工作忙碌而疏於管教，加上自己「未開竅」，難以適應父親的嚴厲管教：「我爸爸用藤條去逼我讀書嗰個方法，我就接受唔到囉。我二年班已經留班喇，全級考最尾。我真係記唔到任何嘢入腦，然後我爸爸又放棄我，即係同我媽講：『算啦，呢個冇得救㗎喇。由佢啦。』咁後尾佢哋就冇再逼我。但我由細到大屋企人都覺得呢個女好蠢、唔得、冇乜腦，第時就要嫁人，做普通嘢，做唔到大事。而我細細個就知道自己嘅地位，慣性知道我要服務我哥哥，幫佢洗嘢、拎鞋。」

憑母愛走出迷惘 TVB時期曾焦慮至胃出血

事業有成的她，至今仍未能完全放鬆，笑言自己是「妹仔命」：「好多人覺得你而家賺到錢、有自己事業，應該過住好舒服嘅生活，但我偏偏係人哋所講嘅『妹仔命』，我係覺得唔得，我一定要執、我一定要整，停唔到落嚟。」她坦言，兒子的出現改變了她的一生：「喺未有小朋友之前，我覺得人生係迷惘嘅。我以為冇一種愛可以超越對父母嘅愛，但直到有咗自己小朋友，你發現原來有一種愛係超越埋自己。即係你會覺得，只要佢OK，我就OK，我可以犧牲所有嘢去滿足佢，呢種母愛係我以前未接觸過嘅，亦成為咗我嘅動力。」

回想在TVB工作期間，她因壓力大而身體崩潰，幾乎每星期都要看醫生：「成日傷風感冒，有時胃炎、胃出血，最大問題係失眠，我差唔多晚晚都瞓唔到。瞓得到覺就係好忙、冇時間瞓嘅時候；到真係放假可以休息，又會擔心自己冇價值，懷疑自己係咪做得唔夠好，變相身體越嚟越差。」

Coffee坦然面對昔日負面新聞：怪自己蠢

入行多年經歷過不少風波，林芊妤直言當時因為太年輕而犯錯：「好多嘢我都唔識處理，或者會聽咗身邊人講，好容易受人影響。當事情發生，有好多唔知信唔信得過嘅聲音出現，我就好亂。喺好急嘅時候，我就不停做錯決定。而家諗返，如果由而家嘅我處理，件事根本唔會鬧到咁大。喺呢件事上面，我冇怪過任何人，怪嘅係自己蠢、唔識handle，而唔係怪人哋點對我。不過，我覺得呢個經歷係必須嘅，係人生需要面對嘅教訓，經歷過後，我就可以更加成熟去行之後嘅路。」

Coffee揭「跪求原諒」真相嘆被貼「港女」標籤

訪問中，她亦主動澄清當年與老公（當時為男友）在蘭桂坊一幕「跪街」新聞的真相。當時兩人發生口角，她氣得想離開，卻被傳媒描繪成「港女」發難：「嗰陣我同我老公啱啱一齊，有次同佢同埋佢啲朋友去酒吧飲嘢，我老公飲多咗。佢有個好朋友係鬼佬，我哋傾偈，完全冇任何肢體接觸。但我老公突然之間jealous（呷醋），話：『你得啦，去傾啦！』跟住喺隔離不停講埋呢啲嘢。我覺得煩想走，就喺中環走人，佢追出嚟拉住我、唔畀我走。突然之間……我就同佢講：『你可唔好喺條街度咁樣？』因為嗰陣仲有好多年青狗仔隊，我唔想無啦啦畀人擺上新聞。我就同佢講：『我求下你啦，你可唔可以起身啊，我求下你啦！』跟住佢一直單腳跪喺地下，真係畀人影到。嗰陣雜誌封面話我『港女』，話Coffee貪慕虛榮、公主癌、不可理喻。但你聽返成件事就知，其實不論發生咩事，傳媒都會將呢個『港女』人設擺喺我身上。」