黃淑儀飛台灣探馮淬帆食閉門羹終身遺憾 陪去夜總會箍煲慘被前夫懷疑出軌
發佈時間：10:00 2026-09-24 HKT
70年代「四大花旦」之一的「Gigi姐」黃淑儀自2019年離開TVB後幕前工作大減，本來過着半退休的生活的黃淑儀近日進軍YouTube界，與好友楊紹鴻在YouTube主持節目《歲月友情人》，日前播出的一集，談及已故舊拍檔馮淬帆（謹哥）。當年僅 19歲的黃淑儀在1968 年與馮淬帆合演TVB首部自製長篇電視劇《夢斷情天》，兩人一炮而紅，更被全港觀眾封為「螢幕情侶」。當時黃淑儀青澀稚嫩，全靠性格嚴謹、工作認真的馮淬帆在旁悉心帶領，才讓她一步步蛻變成演技派天后。
黃淑儀坦言「閉門羹」事件令她深感遺憾
馮淬帆晚年移居台灣，生活極其低調，黃淑儀多年前曾專程飛往台灣，希望能與老拍檔聚舊，沒想到卻吃了「閉門羹」。消息傳出後，外界猜測二人關係生變，但黃淑儀隨後澄清，馮淬帆晚年飽受肺病折磨，性格傲骨、愛面子的他，「最不希望朋友見到自己病懨懨的脆弱模樣」，所以才選擇躲起來。今次在節目上重提往事，黃淑儀坦言此事令她深感遺憾。
相關閱讀：汪明荃死敵因身體特徵遭導演嫌棄要求「剝掉」 堅拒為星途就範：我寧願唔做
黃淑儀在節目重提當年食「閉門羹」一事
馮淬帆晚年健康出現問題，馮淬帆曾表示：「咩病都有，冇咩嚴唔嚴重，每科醫生都睇過，糖尿病、心臟病、貧血等等，無所謂，我都老喇。」到了2025年5月，馮淬帆在社交平台透露自己身體不適入院，並需要依賴氧氣機生活，可惜在10月31日，馮淬帆的生命指數急劇下降，在多年好友陪伴下，走完人生最後一段路。黃淑儀在節目重提當年食「閉門羹」一事，她感慨地說：「呢件係我好遺憾，又想鬧馮淬帆嘅一件事。嗰陣你（楊紹鴻）話要去台灣，咁啱我又喺香港，又得閒，我記得好似4月1、2號，佢就話呢3號出驗身報告，就話3號之後先至見我哋。結果3號打電話畀佢，佢同你（楊紹鴻）講『都話咗唔見咯』，我冇佢個聯絡，係你仲同我講：『你以後呀，唔好話畀香港人聽呀，話我點點點唔舒服呀，唔使佢哋嚟探我呀。』咁你呢就話：『唔係喎，黃小姐喺加拿大飛嚟喎，你再講你信唔信我拉黑你呀嗱？』。」黃淑儀坦言當刻覺得憤怒：「我專程去台灣都探佢，見下佢，話晒佢都係我第一個螢幕上嘅男朋友呀，我心愛嘅愛人嚟㗎嘛。我真係好想見下佢，我真係好敬仰佢，但佢唔肯見我，咁我嗰次真係白行一趟。」
楊紹鴻不太清楚馮淬帆的病情
楊紹鴻說：「我理解呀，因為佢之後都有同我講，『唔該你以後唔好帶啲人過嚟，你先同我講，我唔係個個見㗎。我淨係見邊個邊個邊個』，佢數咗唔係好多個名，十隻手指數晒都冇咁多，佢嘅脾氣係咁。原來謹哥check到佢身體有事，佢不嬲都覺得自己好強壯㗎，應該唔會有咁多問題出現，同埋佢條腰骨好痛，痛到佢好辛苦。所以我每一次過去，都帶啲膏藥畀佢。」不過楊紹鴻不太清楚馮淬帆的病情，因為他確實鮮有向朋友公開，而最令楊紹鴻感到心悒，是在靈堂上見馮淬帆的最後一面：「我最唔expect 嗰樣嘢呢，就出現喺我眼前，就係喺靈堂度，我唔諗住係會瞻仰遺容㗎。點知有呢個儀式，啲人個個喺度望佢最後一面。我望唔到呀，真係頂唔順。你知啦，一個人走咗係會變咗形，我返到酒店幾日都唔安樂，幾日都冇出街，跟住我就寫咗一首歌，就係張德蘭幫我唱咗嗰首叫〈惜緣〉，紀念我呢位恩師。」
相關閱讀：馮淬帆辭世享年81歲 曾醒明證摯友噩耗：深感難過痛惜！5月曾入院依賴氧氣機生活
黃淑儀與馮淬帆食飯遭劉芳剛誤會
黃淑儀曾與比自己年長21年的導演劉芳剛結婚，惟婚姻只維持了8年便告終，黃淑儀說：「有一次呢，我哋收工佢就話：『陪我去坐吓啦。』佢帶咗我去尖沙咀一間夜總會，原來喺枱上面唱歌嗰個係佢女朋友，呢間係正經嘅夜總會，冇小姐陪坐嗰啲。佢就同個經理講：『陣間請溫小姐落嚟。』呢個溫小姐係佢台灣嚟嘅女朋友，佢介紹咗畀我識，好彩我識啲國語啦，同佢溝通啊，好好傾啊咁樣。馮淬帆跟住就話：『我送隻戒指俾佢，佢掟咗落窗。』我仲講笑話下次話我聽，等我喺後面接住，鑽石戒指喎。嗰晚緩和咗啲氣氛幾好，然後送我返花墟先，再送溫小姐返屋企。」黃淑儀坦言「累死我」：「原來劉芳剛已經打電話去問嗰日收工係幾點鐘，點解我仲未返到屋企？然後望落去，見到有個男人送我返嚟？嗰陣溫小姐同我坐喺後邊，佢坐前頭。然後我落車嗰陣時，佢就開咗門，佢坐返去後邊。我上咗樓劉芳剛就問我係邊個，我咪話同阿謹，同佢女朋友『箍煲』，但係劉芳剛唔信。佢睇見個top shot咋，唔知嗰個係馮淬帆嚟㗎嘛。」
