Jeremy李駿傑首戰舞台劇接Frankie棒 最怕背台詞驚發台瘟 強尼續演原角：有新調整
發佈時間：16:15 2026-04-25 HKT
MIRROR成員李駿傑（Jeremy）、強尼與黃靖程今日（25日）出席舞台劇《大象的告別式2.0》記者會進行宣傳，將由6月12日至21日假東九文化中心劇院一連舉行九場演出。三位受訪期間透露劇組已於一周前開始綵排，李駿傑由上輯觀眾到成為主角，亦有參與創作改動部份：「今次換咗我呢個演員，有為咗我更貼切角色陳朗而作出少少改動。做觀眾嘅時候已經覺得好好笑，會諗『如果唔係咁會點？』所以都有提出意見試下都幾好。」出品人兼女主角黃靖程表示《大象的告別式2.0》相比上次演出，在角色設定、佈景、歌曲均不盡相同，李駿傑亦將於台上演唱：「大約七、八首歌。」黃靖程則笑言有合唱、獨唱歌曲，僅唱幾句也會計算在內。
李駿傑預留2個月綵排
李駿傑透露接演舞台劇後已率先預留檔期進行綵排：「綵排大約個半至兩個月左右，中間其實都有《Chill Club》等工作。」但會以舞台劇作為優先。李駿傑亦曾向於2023年演出《大象的告別式》的隊友陳瑞輝（Frankie）請教，得知舞台演唱難度高後亦向黃靖程取經：「尋日小龍有教舞台劇唱歌嘅方法，同演唱會好唔同，終於明皮皮點解覺得難。」至於首次演舞台劇的最大挑戰，李駿傑大方笑指：「最大難題係記台詞！因為冇提詞器，又唔似唱歌咁記歌詞，真係有恐懼！想練習到變成身體反應。」但亦透露另一恐懼：「我好驚發台瘟，如果個腦真係一片空白咁點算？」黃靖程隨即開玩笑：「我哋到時會落幕！中場休息15分鐘。」
MIRROR輪流演出強尼頂唔住?
強尼作為《大象的告別式》原班人馬之一，表示原本有意挑戰另一角色，但目前仍會重演原角，並在基礎上調整：「開始綵排一星期尚有好多空間可以變化，雖然係做同一個角色。（做女角？）挑戰女主角唔易哽㗎！第二次再做一定有調節，沉澱過會有新睇法；做第二個角色對觀眾會有新鮮感。」黃靖程出品的《大象的告別式2.0》已先後由兩位MIRROR成員主演，被問到能否齊集12位成員輪流演出，她笑言：「如果去到12.0強尼應該頂唔住！我都希望有新劇目帶畀觀眾。」
