陳詠詩貼錢打工唔介意大派利是 袁文靜為慳家便利店食麵包丨獨家
發佈時間：07:00 2026-02-13 HKT
今屆港姐冠軍陳詠詩、季軍袁文靜、「上鏡」兼「友誼小姐」李尹嫣首年以港姐身份過年，驚喜要派利是給幕後團隊。陳詠詩坦言要貼錢打工，但望皆大歡喜；袁文靜量入為出，爆響口話日日食麵包，李尹嫣即打圓場強調係鍾意食，唔係捱。3人盼新一年事業有所突破。 採訪：方騫平 攝影：朱偉彥
陳詠詩、袁文靜、李尹嫣得悉過年要派利是給一班幕後人員時，既驚且喜。被指有錢女的陳詠詩，笑言由入行至今賺到幾多就奉獻出嚟：「幫過我哋嘅工作人員好多，預算200封就差唔多。興起時會畀大封啲，只要工作人員開心就好了。」
袁文靜想封1蚊
李尹嫣預算跟薪金及資歷成正比，畢竟只係新人。袁文靜搞笑話：「咁畀1蚊！」聽到封1蚊欠吉利時即改口：「咁就8蚊，代表發財啦，香港人鍾意恭喜發財。」她表示將錢用來求學，派利是會好肉痛，故8蚊好合理，「全世界接受我派8蚊，最緊要開心，我可以畀100個8蚊。」經濟學碩士畢業的袁文靜，以身作則教香港女仔不要胡亂花錢：「要學識收支平衡，唔能夠先使未來錢，唔係窮先慳家。」
李尹嫣盼新一年搵多啲
過去1年港姐收入唔多，但李尹嫣形容港姐身份是一生榮譽，能有一個舞台令人認識自己已是最值錢。追問可要貼錢打工？她則說：「如果生活簡單係可以生活到嘅。」陳詠詩坦言過去6個月要貼錢打工，不過，認為港姐屬職責，非賺錢心態，亦冇計算貼幾多。袁文靜自言生活簡單不用貼錢：「因為要減肥，每日只係食一餐半，而且住得好近公司可以行路返工。」她又自爆由選港姐開始平日在便利店搵食：「便利店就係我哋嘅canteen（飯堂），入面有好多選擇，我哋主要食麵包及雞蛋。」問到是否窮到要捱麵包？李尹嫣即打圓場：「唔係，係我哋鍾意食嘛，我哋鍾意食啲小朋友嘢，唔可以用個捱字。」袁文靜補充返：「唔使捱，生活幾好。」李尹嫣盼新一年搵多啲；陳詠詩想用體操功夫拍武打片；袁文靜則想平衡藝人與兼職教書工作。而陳詠詩自公開戀情後更加自在，唔使收收埋埋；袁文靜唔介意公開，但教授男友想保持私隱。
