林盛斌大女林霏兒遭網民性騷擾擬告上法庭？Bob終極發文：可能構成2至3個違法行為
發佈時間：14:00 2025-10-24 HKT
現年46歲的TVB「金牌司儀」林盛斌（Bob）是娛樂圈中的多仔公，結婚18年的他，與太太黃乙頤（Pearl）育有三女一子，大女林霏兒（Faye）已經17歲，長得亭亭玉立，更不時在網上晒靚相。林霏兒早前在社交網限時動態發文透露遭網民性騷擾，事件引發軒然大波，而作為父親的林盛斌今日（10月24日）終於發長文回應，更將一名網民的留言「貼堂」公審。
林盛斌發千字文：己所不欲
林盛斌今日在社交平台發文，並附上一張網上留言截圖。由林盛斌貼出的網民留言，內容為：「咁嘅樣都食得落，邊位仁兄咁樣為呢除害，香港政府應該要頒個大紫荊勳章俾佢。」林盛斌留言說：「有時網絡世界嘅嘢，係有啲恐怖嘅，有個律師朋友話俾我知，其實網上寫呢啲嘢，已經可能構成兩至三個違法嘅行為。Kenny，我相信我唔認識你，你亦都唔認識我，我唔知道你出呢個post嘅意圖係乜嘢，可能你係想蹭吓個熱度，蹭吓個流量？定係想侮辱吓我嘅屋企人，希望令到佢哋唔開心？如果係咁嘅話，好遺憾要同你講聲，你呢個唔係太有善意嘅企圖，應該好難成功。尋晚我將你呢個post俾咗我啲屋企人睇，佢哋完全冇任何嘅感覺，大家姐仲話你揀呢張相幾靚添，所以唔好意思，令你失望，我個仔仲問我，點解你個樣係一支紅酒同埋一件蛋糕，跟住我哋一家人就笑得好開心。我想講，我同我嘅屋企人，包括我太太同啲小朋友，都比你想像中勇敢、堅強、正面、有胸襟、有自信。可能你出呢個post嘅時候會覺得好好玩，好得意，又或者想得到其他人嘅認同令到你嘅感覺良好啲，我估我呢個post應該令你感覺到你會多返啲存在感。我見到你話想搵個地方寫吓嘢，識吓人，你呢個想法係好好嘅，我亦都非常支持，但係如果係要寫呢啲嘢去引人注意，你都要諗吓你吸引返嚟嘅，會係啲咩人。我相信你都聽過一句說話：己所不欲，勿施於人。」
相關閱讀：林盛斌大女林霏兒未成年慘遭性騷擾 嬲爆駁火意淫網民 怒斥「骯髒過份」籲積口德
林盛斌兒子妙問：吓，佢驚咩呀？
其後林盛斌在於自己的帖文中留言續說：「你諗吓，如果我將你阿媽個樣post出嚟，然後寫返類似你寫嘅字，你嘅感覺係點呢？佢嘅感覺又會係點呢？又或者唔係你阿媽，係你嘅女朋友，或者好朋友，佢哋又會有咩感受呢？認真嘅，我真係好想你好好諗吓。我絕對唔係聖人，我都試過講錯嘢，亦都試過做錯事，我仍然努力學習去改進同改善中，慢慢去認知乜嘢係啱，乜嘢係唔啱，你呢個post嘅內容，確實，真係有啲唔係咁好。其實，真係冇要求過要你特別去愛我哋，但係又有冇需要專登去攻擊同傷害呢？你可能對我或者對我嘅屋企人有意見，不過，我仍然衷心祝福你有開心同愉快嘅生活。要話返俾你聽，最後我都有答返我個仔個問題嘅，我同佢講：「可能呢個哥哥好驚俾人見到佢個真樣，所以佢咪唔放自己個頭像上去囉，你見佢之前出嘅所有嘢都冇佢個樣㗎，咁佢就可以喺個網絡上面寫好多嘢，啲人都唔知佢係邊個，好似寫乜都得咁囉。」跟住佢話：「吓，佢驚咩呀？」係囉，Kenny，你驚咩呀？」
林霏兒稱收到不雅字句
林盛斌早前曾透露大女林霏兒蜜運中，但原來林霏兒桃花運旺，初戀之後換畫，又在三個月內分手。其後林霏兒日前便在IG的限時動態公開受到性騷擾的字句，以黑底紅字怒斥：「骯髒過份」，又強調為要為女性發聲：「太過分，有必要講出嚟！」
林盛斌大女林霏兒當時指，自己收到的粗俗意淫字句，不堪入目又露骨：「可以一X」。林霏兒就以：「積下口德好」回覆，怎料對方再留下：「積下陰X德啦你」。林霏兒將截圖放到IG表達不滿：「控制唔到呢位仁兄講乜，但係其實我真係好多人愛，好多人錫㗎！」又反問對方是否活得更幸福及被愛。
林霏兒之後再出PO表示：「我認為太過火，有必要講出嚟。為自己發聲永遠沒有錯。」林霏兒再以英文寫道：「我希望令這個城市、這個世界變得更美好。特別是為了那些在香港感到不安全和沒有受到保護的女孩子們。我會支持你，與你同在。重申，為自己發聲永遠沒有錯。」
