張致恒首談Boy'z合體：願全面配合Kenny 隨七師傅探長者送暖傳遞正能量丨獨家
發佈時間：22:45 2025-09-25 HKT
張致恒（Steven）與太太雯雯結婚6年育有4子，長期財困要賖借度日，直至近三個月轉行做電器搬運工，為養家捱到五勞七傷，不過決心「洗心革面」的他積極面對人生，日前更隨七師傅（七仙羽）一齊探訪老人院。對於昔日Boy'z隊友關智斌（Kenny）明晚及後晚開個唱，並召喚他合體，Steven首開腔回應，坦言未準備好，但「欠Kenny太多」，願意全面配合，同時感激七師傅在低谷時的無私支援。 文：娛樂組 圖：林賓尼
經常投身慈善活動的七師傅，今次拉埋Steven到葵芳一間老人院做中秋探訪，準備大量禮物並和公公婆婆玩遊戲，場面溫馨。穿着殘舊衫及爛波鞋的Steven全程投入，七師傅希望他多參與公益活動，踢走煩惱增添正能量，更力撐：「聖人都有錯啦！更何況我哋唔係聖人，都係處於學習階段。」七師傅又特別關心Steven 4名子女：「Steven唔係游手好閒，佢人工唔多卻要照顧4個小朋友，真係有需要我幫忙。」
被認定懶蟲 死性不改
對於《東周刊》早前獨家直擊Steven在黑色暴雨警告下仍冒雨開工送電器，淋濕身獨力搬重型雪柜上唐樓。Steven展示手腳傷痕，坦言3個月搬運工作捱到病，但總算練到一身肌肉。對於被網民封為「勵志人物」，他笑言：「呢個係我畀自己嘅希望，但冇人知下一步會點樣，只能做好自己，希望自己唔好咁早死，留返條命嚟照顧小朋友！」不過Steven相信好多人眼中的他仍然是死性不改「大懶蟲」：「佢哋對我有苛求，覺得我工作唔夠24小時就係懶惰。哈！坦白講我都係人，都會攰，所以唔算盡晒全力，但都做啦做啦，唔理得咁多喇。」七師傅就表示體力勞動可以幫他修心養性。問到是否修心養性變乖？Steven笑着強調：「我一直都好乖㗎！𠵱家我除咗開工、就係返屋企幫手湊仔！」並直認已過年少輕狂階段：「我都41歲啦，𠵱家雖然好攰，雖然人生有多啲經歷，但好滿足感覺自己仲生存喺世界上，可以負返啲責任，既充實又舒服。前路就算崎嶇少少，至少都冇咁悶，好似打機咁，有攻略又有乜好玩？」
兄弟情在心 互不打擾
至於Kenny明晚開個唱，並提到Boy'z合體可能性，Steven首次回應：「我都一直等緊希望有機會再合體㗎！只差一個緣份，希望有機會時大家唔好嫌棄我唱歌走音！不過，我覺得有啲嘢過去咗就過去咗，大家要搵返當年嗰個狀態係冇可能嘅，睇下大家能唔能接受新狀態啦。」Steven又強調兩兄弟冇芥蒂，兄弟情在心中，自爆：「6年前出事後，佢單飛開騷時有邀請我留喺後台免被噓！」
感謝七師傅 用愛包容
Steven堅稱Boy'z係集體回憶，永不磨滅，更保證：「只要想就會出現，在乎大家想唔想佢出現。」若能合體，佢坦言第一時間要多謝七師傅：「喺我人生低谷時，佢好似家姐咁支持我，叫我『唔好放棄』，仲好用心照顧我啲仔，用愛包容我。如果冇佢，條路更加難行，佢直情係我心靈氧氣不停畀我吸呀！」七師傅則叫Steven不要客氣，除和她夫婿同是「荷蘭人」外（混血），兩人同病相憐被攻擊：「我明白被鬧感受，其實每個人都有缺點，唔好將人置諸死地。講真邊個藝人冇媾過女呀？後生靚仔自然有飛來蜢，既然冇人完美，就要學識原諒。」最近Steven被同事傳染感冒，食完成藥照樣開工。他更透露四名子女不幸染上手口足病，小朋友口生水泡，痛到食唔到嘢，「大仔兩日冇食嘢，連粥都唔肯吞，唯有多啲灌葡萄糖水，我幾晚冇得瞓。」
