颱風樺加沙丨陳庭欣為返工主持《東張》驚險爬樹獨自上班路況危險沿途步步驚心

更新時間：19:00 2025-09-24 HKT
發佈時間：19:00 2025-09-24 HKT

【超強颱風/樺加沙/打風/天文台/HKO】颱風樺加沙影響下，天文台今日（9月24日）凌晨2時40分改發十號颶風信號，樺加沙於今日早上在香港約100公里外掠過。《東張西望》主持陳庭欣和朱凱婷同樣受到樺加沙影響，前者返工遇阻滯，後者原定外遊慶祝結婚15周年，變成與老公分隔兩地。

陳庭欣要由同事代班

陳庭欣今日原定要返《東張西望》做直播，卻在出門時見到寓所外有大量冧樹情況，陳庭欣上載影片到IG，無奈留言：「究竟最後能唔能夠成功返工，今晚主持東張西望呢？#東張精神」陳庭欣回覆《星島頭條》表示：「返唔到喇！」最終要由同事頂替。

影片中見到陳庭欣穿上雨褸水鞋帶埋長遮，準備充足駕車返公司主持《東張西望》，卻在駛離停車場時，已見到寓所外的通道有多棵大樹堵路，陳庭欣一度停低座駕，嘗試爬過大樹，雖然人可以通過，但座駕無法駛離屋企，而大閘外亦被大樹倒冧封住出入口，難以召喚外來車接載。

陳庭欣被困屋苑感無奈

曾有好心鄰居問陳庭欣是否需要幫忙，或合力搬開大樹，由於陳庭欣離家前已經查詢，指大樹因為根莖連住土壤，只可以鋸斷樹幹不能搬開，估計要等颱風過後才有人員到場處理，令眾住戶相當無奈。

而朱凱婷本來因結婚15周年，早已計畫會合老公去旅行慶祝，沒想到因為颱風行程要取消，老公更因身處美國，航班受颱風影響被取消，目前滯留當地未知歸期。朱凱婷在IG分享當年今日的合照，自我安慰早已「超前部署」與老公拍下靚相，紀念攜手度過15年。

朱凱婷留言：「計劃趕不上變化（天氣），今日原定上機去結婚15周年旅行，當然冇得飛啦！早幾天已取消酒店！老公原定昨晚由美國飛返香港，班機仍然cancel，等待reschedule！」

朱凱婷10月再飛過

朱凱婷表示透過今次從中學習：「Lesson learnt: 婚姻有時都會遇上極端情況，要超前部署，化危為機！我哋10月再飛過！我哋嘅超前部署：一早已影定Pre Anniversary Photos！多謝跨部門協助及配合！」朱凱婷又放閃表示：「我的隊友林先生，呢15年我哋有唔同嘅Milestones，今次經歷10號風球都打唔甩，我哋繼續grow old together，繼續努力經營啦！」