康堤推首支廣東歌《一律建議分手》 創作靈感自親身經歷 獲黃偉文親自填詞
發佈時間：16:45 2025-09-18 HKT
康堤（CONSTANCE）繼她英文歌曲《doll》後，新歌《一律建議分手》由她本人和Eason YH Chan及Ernest Choi一起創作，黃偉文作詞。新歌延續擺脫「有毒關係」的主題，但將焦點從愛情中的糾纏轉向跨越界線的友誼。康堤用歌曲表達自己堅定的立場，拒絕被捲入那些與自己無關且不必要的鬧劇或情感負擔。新歌靈感更源於她的親身感受。
搵YY黃偉文去填詞
康堤說：「那段時間好多朋友在感情上出現問題，然後我（當時）又有好多事要處理，覺得好煩，所以就有啲憤怒，跟住就寫咗呢個melody。其實一入studio就同Eason（Eason YH Chan）諗住呢個感受去寫，當初個demo係因為我啲中文唔係咁好，所以我就用中文數字去寫。之後就搵咗YY黃偉文去填詞，YY就寫咗一份好好嘅詞，好適合我當初寫呢隻歌所諗嘅感受。」她續說：「寫呢隻歌嘅過程其實幾好玩，bridge部分係英文字，我喺studio尖叫發洩情緒。最好笑係我哋搵到一個尖叫聲sample，最後就放咗落去，我要澄清返其實嗰把聲唔係我。」
表情管理不容易
康堤亦分享關於拍攝MV的搞笑事，「拍MV時有一幕要抌紙，令我有啲愕然，之前《doll》嘅MV要抌羽毛，呢個MV又要抌紙，唔知點解有少少尷尬，而且要同時管理表情，嗰樣憤怒之餘又要cool cool哋，加上工作人員係上空抌啲紙跌落嚟，我好驚啲紙會𠝹到我塊面，而家諗返起覺得呢一幕好搞笑。另一幕要跑步，當初知道個效果係需要有啲slow motion，我就心諗：『吓，我係咪要slow motion跑步？』但原來最尾知道係可以正常跑嘅，但我都諗緊我嘅表情係咪要好淡定？我覺得呢兩個scenes都幾搞笑、幾好玩。」
新歌未算最完美
康堤自認新歌未算最完美，需要下苦功練習廣東話，「錄音嘅時候Ernest最苦惱，因為當時我喺佢後面睇佢剪take，可能我由細到大唔係特別聽好多廣東歌，啲口音就出哂嚟，跟住錄音嘅時候Ernest就剪得好辛苦，我要加倍練習下啲廣東話，而家聽返我都覺得其實唔係最完美。」《一律建議分手》推出後，黃偉文亦分享了他與CONSTANCE的淵源，當年正正是他為康堤取名，29年後她的第一支廣東主打也剛好交到他手上，希望可作為「開學文具」送給她！
