曹敏寶公開與木獨老公磨合之道 推新歌剖析夫妻真實面丨獨家
發佈時間：08:00 2025-09-12 HKT
曹敏寶近日推出首支國語單曲《請你溫柔地傷害我》，邀來孫燕姿、林宥嘉御用馬來西亞音樂人彭學斌擔綱監製，以超強班底打造充滿反思空間的作品。她表示歌曲不僅適用於夫妻關係，亦能延伸至友情與情侶互動，更坦言自己曾遭好友傷害，但重情的她總選擇先犧牲自我利益。 採訪：方騫平 場地：三日月
曹敏寶在大馬錄音過程中情緒潰堤，從頭哭到尾，源於她深入思考夫妻關係的現實面：「其實呢類歌曲題材比較少見，我想大膽挑戰。啲人往往描述到夫妻關係描繪得完美無瑕，但歌曲中『不知不覺耗盡所有的熱烈』一句深有共鳴。」結婚7年的她體悟到，夫妻關係隨時間流逝難免趨於平淡，也是她的自身寫照：「婚姻唔會好似童話世界咁詩情畫意，呢首歌係以呢個角度出發，畀大家反思點樣去維繫及補救疲憊嘅關係。既然曾經相愛，就更該努力重建。」
一凹一凸互相珍惜
曹敏寶坦承與大學教授老公性格迥異：「佢係一個木獨卻理性嘅人，我就係情感充沛嘅娛樂家。我哋畀自己缺乏嘅特質吸引，經歷磨合走埋一齊，我反而特別鍾意沉默寡言嘅人，試過同老公傾偈令佢感動落淚，彼此一凹一凸，互相珍惜。」她分享夫妻相處秘訣在於放大對方優點：「睇缺點好容易，但會掩蓋所有美好。例如我天真易𠱁，係典型雙魚座人格；丈夫卻從來唔會甜言蜜語，只以行動表達。」她舉例老公會主動為她購買生理用品，甚至仔細詢問品牌；產後因傷口問題需臥床1個月，丈夫每日只睡3小時照顧BB，毫無怨言，「呢啲咪好窩心囉，有啲老公睬你都傻，寧願車你出去買，都唔會幫忙選購。」雖然老公不擅溫柔，但行動刻骨銘心：「老土講句『行動勝於雄辯。』所以好珍惜佢。」至於婚姻危機，曹敏寶強調二人始終清晰共同目標：「我哋共同想建立健康家庭，為仔女樹立榜樣。關係需苦心經營，過去風雨只讓感情更堅固，無懼七年之癢。」
談及丈夫是否贊助她的音樂事業？她笑稱會「打斧頭」：「我同朋友吃飯簽佢張信用卡，由佢交卡數！」她強調是自資追夢：「老公只會幫少少！佢支持我追求理想。」她堅持，唱歌20年早已是生活的一部分，不想放棄，加上兒子曾追問：「點解唔再唱歌？」同時也發現自己站在台上時眼睛依然發光。
