應屆「最上鏡小姐」李尹嫣有驚人神力？連富貴公主都被馴服 俯首直認：真係改咗好多
發佈時間：14:15 2025-09-06 HKT
《2025香港小姐競選》已經完滿結束，新鮮出爐港姐冠軍是9號陳詠詩（Stacey），亞軍是7號施宇琪（Angela），季軍是13號袁文靜（Jane），賽前大熱的1號李尹嫣只奪得友誼小姐及最上鏡小姐。不過李尹嫣的媽媽李安琪似乎對賽果有微言，她曾在小紅書公開力撐女兒是民選冠軍，但最後疑因用詞不當遭網民直斥急刪po。
穆斯林公主苑瓊丹與李尹嫣關係匪淺
李尹嫣任職藝人經理人的媽媽李安妮一直為女兒落力為女兒谷人氣，經常公開大讚愛女由細靚到大，又出動「人情牌」，找來圈中藝人好友發文撐女兒，苑瓊丹日前接受鍾慧冰YouTube頻道訪問，她自爆與李尹嫣關係匪淺，還稱李尹嫣天生有一個技能，連穆斯林公主苑瓊丹都不得不改變。
相關閱讀：港姐2025｜經理人媽咪捱轟 力撐女兒李尹嫣是民選冠軍 疑因用詞不當遭網民直斥急刪po
苑瓊丹稱李尹嫣識玩數字遊戲
李尹嫣任職藝人經理人的媽媽李安妮在娛樂圈工作多年，與不少藝人份屬好友，她不時在小紅書貼上與好友們的合照，其中包括苑瓊丹。近日苑瓊丹為好友鍾慧冰的YouTube頻道擔任嘉賓，言談間提及與李尹嫣的關係匪淺，苑瓊丹說：「我最近就識咗個𡃁妹，係港姐1號李尹嫣，佢識得一套功夫，識得玩一啲數字遊戲，佢可以用一啲譬如生日號碼，佢唔係睇八字，生日號碼、電話號碼同住嘅號碼，可以講你嘅嘢出嚟。佢點講我呢？佢話你個人急得好交關，佢唔識我㗎！佢又唔係唔識我嘅，係我朋友個女，但佢喺英國返嚟，冇乜接觸過我。」
李尹嫣成功改變苑瓊丹
苑瓊丹續說：「佢就話你個人好急，但係有個特質係好得意，好鍾意埋單食飯嗰陣時，呢個佢冇辦法知道，仲有呢個細路女叫我改，我真係改咗好多，佢話原本你有好多機會，有更加多比別人搵錢嘅機會，但係有樣嘢係輸咗，輸咗你會有脾氣！佢話其實係啲脾氣燒咗你啲財！原本你好勁，我話係咩？咁我鬧少啲。」鍾慧冰笑稱苑瓊丹確實好容易發火，苑瓊丹笑說：「唔啱梗係要出聲，我成日都話生命好短暫，我成日都話工作好似喺戰場，我連司機遲到兩分鐘都會鬧，不過自從佢話咗我呢樣嘢之後，想鬧人嗰陣就諗一諗，火燒腹得功，吞返落去先，費事教精你喇。」
相關閱讀：港姐2025丨蔡華英有TVB前藝人陪「散心」 落選後終有去向 因一事獲讚：比起某個媽媽說話得體
