林家謙感謝楊千嬅「知音」之恩 首度同台合唱《余春嬌》 揭年頭不開心到台灣散心
發佈時間：20:45 2025-08-27 HKT
林家謙昨晚舉行第6場「White Summer 演唱會」，邀請來楊千嬅做嘉賓，兩人合唱《余春嬌》、《小飛俠》及《再見二丁目》，感動不少觀眾。家謙在台上多謝千嬅，並坦言非常開心：「今次呢個嘉賓環節，其實我想請一啲係我音樂上都很有淵源嘅朋友嚟，你係其中一位！好早時候，你已經係one of 其中一位，肯去用我嘅作品，多謝你。」千嬅笑答：「你寫得好嘛！」家謙表示：「唔係㗎，就算寫得好都未必咁容易被人見到，係初初。咁所以多謝你當年用咗呢首歌。」
與家謙是網友
千嬅坦言這晚是第一次同家謙見面，嚴格來說之前兩人是網友，又表示《余春嬌》這首歌是她演員的生涯中一個很重要的紀錄及里程碑，「余春嬌是帶給我很多演出上的肯定，我亦很有緣分，可以得到你的曲同Wyman的詞，做咗呢隻用戲名裏面角色名的一首歌，所以我要多謝你先啱。」家謙又再道出想請千嬅的第二原因，「適逢我今日音樂總監，當年同你有首合唱歌，佢係蔡德才（Jason）。」千嬅開心道：「係，Jason，好開心呀，今日來rehearsal的時候見到已經好開心。」繼而兩人走到Jason 面前並坐於舞台上，由Jason彈琴，三人再現《小飛俠》，回憶即刻返晒來，千嬅感動道：「Jason其實寫了很多作品給我，大家耳熟能詳的《飛女正傳》、《數你》都是出自佢作品，好多謝家謙開了這道門俾我哋，好感動，好開心，死啦！我都唔知可以講咩啦！」家謙搞笑謂︰「有返返去『加州紅』的感覺！」
《再見二丁目》是comfort song
此外，千嬅又驚訝家謙有cover過《小飛俠》，「6歲你就聽我啲歌？咁有智慧，我大你一對加5年㗎喎！」家謙又再講：「本身千嬅好好，佢話可以配合呢個主題唱《夏天的故事》，但係以下呢首歌（《再見二丁目》），係我野蠻要唱嘅，呢首歌其實對我來講，係有啲感受，今年年頭有啲唔開心，我就走了去台灣幾日散心，一路都係聽住呢首歌，呢首歌真係好感動我。我發覺『原來我非不快樂，只我一人未發覺』，comfort返自己，所以好多謝你（千嬅）、多謝阿Yu、多謝夕爺，當年做咗呢隻歌。」
