陳奕迅確診焦慮症後最新情況 自爆曾收阿媽電話被質問一事 放映會星光熠熠媲美樂壇頒獎禮
發佈時間：16:00 2025-08-14 HKT
陳奕迅（Eason）《FEAR and DREAMS 世界巡迴演唱會》最終站於周日（10日）在澳門舉行尾場後，陳奕迅《FEAR and DREAMS:NOW is the only reality》於香港舉行首映一連放映四場，三場開放給歌迷看之外，第四場特別邀請了一班圈中好朋友包括容祖兒、楊千嬅、梁漢文、馮德倫、許志安、郭偉亮、葉佩雯與及岑寧兒等等，場面星光熠熠，可媲美樂壇頒獎禮。
陳奕迅自爆確診了焦慮症後收媽咪電話
陳奕迅這部紀錄片電影歷時7年、橫跨全球180多場巡迴演出期間拍攝，紀錄片更爆出陳奕迅在杭州舉行演唱會時，已出現精神及情緒問題，確診了焦慮症。陳奕迅在歌迷分享場上，自爆一直因怕媽咪擔心，一直未有談及自己有情緒病，但醜婦終需見家翁，新聞一出，陳媽媽即打來問他為甚麼會這麼大壓力，「其實我真係唔係好緊要，我個病係好輕微，唔係嚴重到行唔到出房門口嗰種，大家唔使好擔心。」
相關閱讀：陳奕迅首公開確診焦慮症 一原因引發情緒病：試過停藥，身體話我知唔得
陳奕迅演唱會完結後，在家中沒有工作，竟然思考下一次演唱會應該做甚麼：「我直頭係諗不如開個大場，自己唔使咁辛苦，開場不如用《亞士匹靈》，《他一個人》都要唱，諗諗下自己摑自己一巴，咩事呀，放假啦，你仲諗！哈哈哈。我不時係演唱會入面吹水，話不如下次是但就咁唱下歌吹下水咪得囉，但係我反問自己，其實係唔得㗎，我做唔到，我要有故事骨幹，我而家已經乾晒，或者去下西班牙、意大利、巴西，去唔同地方睇騷，吸收下唔同文化。睇騷真係好開心，好似我嗰日睇「BIG FOUR」好開心，覺得許志安好有型，有衝動都練下自己肢體Fit啲。」
特別場與好友們難得聚舊
在特別場與好友們觀看完紀錄片後，一班難得聚舊的好友，於影院中不停合照傾偈，容祖兒坦言心情非常複雜，真正感受到陳奕迅是一個將生命奉獻給工作的一個藝術家：「我覺得有啲部分，我好似睇緊鬼片一樣，好緊張，直頭係身同感受，完全感受到佢個fear 。佢好似打咗一場仗，一個個難關去克服，佢經過今次後，應該冇嘢可以再嚇到佢。我哋大家都大個啦，最希望見到朋友，可以每一日做到自己想做的事，每一件事，成功失敗，到最後都希望可以滿載而歸，能於人生中收集好多經驗，好多愛。」楊千嬅亦表示真的意想不到，陳奕迅這次旅程這麼精彩，最希望他可以做回三十年前那個「牙牙擦擦」、「開開心心」的陳奕迅。
相關閱讀：陳奕迅疑焦慮症發作 突於演唱會台上撳住胸口狂喘氣 被指作嘔表情痛苦
陳奕迅打網球受傷擔心聽覺有問題
陳奕迅去年6月在室外打網球時中暑休克暈倒，腮骨骨裂及下巴受傷，需縫逾30針，蘇永康稱當時一直於醫院陪伴，因當時仍未康復，陳奕迅總是擔心耳仔聽不清時，於是蘇永康不時跟他通電話，安慰他不用擔心：「人生入面有很多fear，可能有時有一些問題，不能馬上解決，就先放一邊，學習與問題共存，終有一日可以解決的。 」梁漢文亦表示作為身邊一個好朋友，很早已知道他的一些感受，例如早期要取消香港站，當時他們正一起打網球，期間收到這消息，感受到他的fear：「大家都係男人，我哋又唔會講咁多，見到佢去咁多地方，做咁長tour，戥佢好開心。」
郭偉亮笑陳奕迅不嬲都Short
郭偉亮覺得這部電影「真係好正」，其實無論一個幾勁的人，都是一個人，不是超人，任何事都要付出的。至於大家都關心陳奕迅的情緒病，郭偉亮就笑道：「佢不嬲都Short㗎啦！哈哈！佢將情緒係歌到發洩晒出嚟就得㗎啦！唔使擔心，佢有咁多好朋友係身邊。」許志安坦言看完紀錄片，自己的心也舒服了不少：「感受好深，鏡頭前都係好真實嘅佢，兩三年前，我都有fear嘅時候，佢寫咗首歌畀我，我好佩服佢，喺佢生病過程當中，仍然可以咁強。呢套紀錄片直頭係一粒藥，可以交畀其他有病的人食咗好返嗰種！有呢個朋友，真係好正，歌又正，又帶比大家好多歡樂。」 岑寧兒稱在紀錄片看到陳奕迅也在成長中，「每個人都要適應，每一日起身新的一個自己，好有啟發性。我想同佢講，放假啦，好嘢！可以去攬住啲病嘅人錫啦，好好休息下，再前進。」
相關閱讀：陳奕迅女兒陳康堤簽約華納後首登台 見慣大場面唱新歌氣場勁 網民點評：天生明星相
