吳業坤畀老婆揶揄做到先講 新歌《愛情求生案內書》教男人「求生」秘技丨獨家
發佈時間：07:00 2025-02-26 HKT
吳業坤2022年跟日籍太太浜口愛子成婚，升呢人夫。最近他推出新歌《愛情求生案內書》大講男士在愛情中的「求生」秘技，卻被太太揶揄唔好得把口唱，自己都要做到，原來坤哥婚後仍不時「瀨嘢」，明知太太愛儀式感，卻因太懶差點出事。他又坦承當人夫後，做人處事確有不少轉變，所以暫時未準備好去另一階段當人父。採訪：杜杜 攝影：譚志光 髮型:Ken Yong@Hair Corner Art Mall 化妝:Kyo Lee、Bingo Chan 場地:BLACKROOM@blackroomhk
坤哥受網上短片啟發，想到新歌《愛情求生案內書》主題，「成日睇啲無聊短片，啲男仔對住女朋友話『求生欲』好強，不如攞嚟做隻sweet嘅情歌啦！」鮮有出甜蜜情歌的他，更希望此歌能幫到一眾男士，「呢啲咁貼地同直白嘅情歌，相信係第1次，都好想天下嘅男生聽完之後，當係本神聖手冊，女朋友遇到咩生活不如意事，佢哋要『求生』時就打開呢隻歌。」
嗌文有語言障礙
坤哥坦承婚後，更加明白「求生」是無時無刻，「好似歌詞咁講，『像國防備戰，朝早去到夜晚』，拍拖唔見幾日都得，但結咗婚冇可能，日日都要見，『求生意志』係要強啲，要keep住。」正因跟太太朝夕相對，他直言「瀨嘢」機率亦大大提升，最近的個案就是以為不用刻意慶祝節日，「諗住喺屋企煮飯算，原來佢好需要儀式感，佢以為我會book咗餐廳畀驚喜佢，男士唔可以將所有嘢係理所當然，呢個就犯咗錯誤，要即刻補鑊，佢唔係嬲豬嘅係失望囉！我應該知道佢想點㗎嘛！」拍拖時已知愛子是需要儀式感，他只怪做得未夠好，「只係我懶咗，所以係要打醒12分精神。」幸好他及時發現「瀨嘢」，「總之感受到氛場嘅變化，好彩當天發覺，仲可以book到餐廳。」
坤哥又慶幸太太是個直接的人，有唔開心通常會講出來，「估吓估吓仲麻煩。」不過就算他日文再好，跟太太始終有語言障礙，有時會演變成衝突，「我哋都係講日文，但我唔係母語，1個字都可以差少少意思，譬如講『最低』，我睇字典學覺得形容得好過份，但佢可能只係平時講『乜你咁衰㗎』，呢啲語言障礙，變成鬧交各有各鬧，原來講緊嘅嘢或者鬧緊喺唔同軌道上。」他又自爆平日「出事位」，「有啲嘢唔夠細心漏咗講，譬如呢幾日要做嘢，本身約咗佢食飯，好容易唔記得咗，女仔對承諾睇得好緊，但我成日忘記咗。」
未準備好做人父
成為人夫2年多，坤哥受太太影響亦轉變了不少，會較以往有儀式感，「佢鍾意聖誕節擺棵樹喺度，新年又擺棵蘭花，喺聖誕節附近日子，我見到得意嘅聖誕老人咪買返去，唔係咩大事，但會畀佢慢慢感染咗，以前會冇乜所謂。」以往口無遮攔的他，也學識收斂，「佢講過，我𠵱家講每句說話會影響到佢，以前我冇諗，阿媽唔會同我講呢啲嘢，以前我乜都講，好似口花花咁，尤其是做呢行，原來會影響到佢，𠵱家真係好少，怕講多錯多。」就連出街應酬他亦減少了，「我𠵱家都好少出去飲嘢，如非必要都唔出去。」他有試過帶埋太太同行，但令他好攰，「要不停繙譯，繙譯係好辛苦嘅事，會用好多腦力，咁不如算啦！」
坤哥為了令太太安心，就連拍MV選擇女主角也變得相當小心，「專登唔揀啲咁火辣辣嘅model，有啲好sexy就已經排除在外，況且個MV都唔需要太激，簡單搵個cute cute嘅女生。」而親暱劇情亦會多了考量，「以前可能冇乜所謂，𠵱家會諗，減到都會盡減。」講到新歌，他指太太大概睇得明歌詞，「唔係太深，書面語係容易睇啲，佢都有問係咪寫畀佢，都要話係嘅！」講到太太反應就相當搞笑，「佢叫我要做到，我都做到7成，都有進步空間。」仍在學習做人夫的他，坦承未有計劃做人父，「自己未ready，又見過練空手道啲師兄話，練到1個鐘算係咁，要返去湊仔，我聽到都係等多陣先，因為之後冇得自私，所以自私多陣先。」
