吴业坤畀老婆揶揄做到先讲 新歌《爱情求生案内书》教男人「求生」秘技丨独家
发布时间：07:00 2025-02-26 HKT
吴业坤2022年跟日籍太太浜口爱子成婚，升呢人夫。最近他推出新歌《爱情求生案内书》大讲男士在爱情中的「求生」秘技，却被太太揶揄唔好得把口唱，自己都要做到，原来坤哥婚后仍不时「濑嘢」，明知太太爱仪式感，却因太懒差点出事。他又坦承当人夫后，做人处事确有不少转变，所以暂时未准备好去另一阶段当人父。采访：杜杜 摄影：谭志光 发型:Ken Yong@Hair Corner Art Mall 化妆:Kyo Lee、Bingo Chan 场地:BLACKROOM@blackroomhk
坤哥受网上短片启发，想到新歌《爱情求生案内书》主题，「成日睇啲无聊短片，啲男仔对住女朋友话『求生欲』好强，不如攞嚟做只sweet嘅情歌啦！」鲜有出甜蜜情歌的他，更希望此歌能帮到一众男士，「呢啲咁贴地同直白嘅情歌，相信系第1次，都好想天下嘅男生听完之后，当系本神圣手册，女朋友遇到咩生活不如意事，佢哋要『求生』时就打开呢只歌。」
嗌文有语言障碍
坤哥坦承婚后，更加明白「求生」是无时无刻，「好似歌词咁讲，『像国防备战，朝早去到夜晚』，拍拖唔见几日都得，但结咗婚冇可能，日日都要见，『求生意志』系要强啲，要keep住。」正因跟太太朝夕相对，他直言「濑嘢」机率亦大大提升，最近的个案就是以为不用刻意庆祝节日，「谂住喺屋企煮饭算，原来佢好需要仪式感，佢以为我会book咗餐厅畀惊喜佢，男士唔可以将所有嘢系理所当然，呢个就犯咗错误，要即刻补镬，佢唔系嬲猪嘅系失望啰！我应该知道佢想点㗎嘛！」拍拖时已知爱子是需要仪式感，他只怪做得未够好，「只系我懒咗，所以系要打醒12分精神。」幸好他及时发现「濑嘢」，「总之感受到氛场嘅变化，好彩当天发觉，仲可以book到餐厅。」
坤哥又庆幸太太是个直接的人，有唔开心通常会讲出来，「估吓估吓仲麻烦。」不过就算他日文再好，跟太太始终有语言障碍，有时会演变成冲突，「我哋都系讲日文，但我唔系母语，1个字都可以差少少意思，譬如讲『最低』，我睇字典学觉得形容得好过份，但佢可能只系平时讲『乜你咁衰㗎』，呢啲语言障碍，变成闹交各有各闹，原来讲紧嘅嘢或者闹紧喺唔同轨道上。」他又自爆平日「出事位」，「有啲嘢唔够细心漏咗讲，譬如呢几日要做嘢，本身约咗佢食饭，好容易唔记得咗，女仔对承诺睇得好紧，但我成日忘记咗。」
未准备好做人父
成为人夫2年多，坤哥受太太影响亦转变了不少，会较以往有仪式感，「佢钟意圣诞节摆棵树喺度，新年又摆棵兰花，喺圣诞节附近日子，我见到得意嘅圣诞老人咪买返去，唔系咩大事，但会畀佢慢慢感染咗，以前会冇乜所谓。」以往口无遮拦的他，也学识收敛，「佢讲过，我𠵱家讲每句说话会影响到佢，以前我冇谂，阿妈唔会同我讲呢啲嘢，以前我乜都讲，好似口花花咁，尤其是做呢行，原来会影响到佢，𠵱家真系好少，怕讲多错多。」就连出街应酬他亦减少了，「我𠵱家都好少出去饮嘢，如非必要都唔出去。」他有试过带埋太太同行，但令他好攰，「要不停繙译，繙译系好辛苦嘅事，会用好多脑力，咁不如算啦！」
坤哥为了令太太安心，就连拍MV选择女主角也变得相当小心，「专登唔拣啲咁火辣辣嘅model，有啲好sexy就已经排除在外，况且个MV都唔需要太激，简单揾个cute cute嘅女生。」而亲暱剧情亦会多了考量，「以前可能冇乜所谓，𠵱家会谂，减到都会尽减。」讲到新歌，他指太太大概睇得明歌词，「唔系太深，书面语系容易睇啲，佢都有问系咪写畀佢，都要话系嘅！」讲到太太反应就相当搞笑，「佢叫我要做到，我都做到7成，都有进步空间。」仍在学习做人夫的他，坦承未有计划做人父，「自己未ready，又见过练空手道啲师兄话，练到1个钟算系咁，要返去凑仔，我听到都系等多阵先，因为之后冇得自私，所以自私多阵先。」
