泰臣期望成功轉型較成熟角色 羅雲龍計劃在港開壇宏揚道家思想丨獨家
發佈時間：08:00 2025-02-15 HKT
泰臣（翟凱泰）和師弟玄學家羅雲龍（龍師傅）在龍年各有發展，泰臣參演開電視原創劇《我愛九龍城》，開心嘗試轉型較成熟角色；龍師傅則到南京修道多個月，更計劃在港開設首個「上清宗壇」。踏入蛇年，兩人坦承巿道差，幕前演出機會緊張，將主力發展文化事業及教育工作。採訪：杜杜
本身是道士身份多年的龍師傅，去年再到南京高淳區游子山的真武廟修道，「本身畀11人去學道3星期，但後尾師傅畀我哋再學，我留低咗4、5個月，仲有機會正式拜師入門，真係收獲好大，唔單止係法術上同理論上，道家思想幫助到我待人處事，用道家智慧去解決問題。」踏入新1年，他希望有機會再修練外，有更大目標，「師傅支持我返嚟香港開首個上清宗嘅道壇，希望可以宣傳到道教，同埋幫到更多人。」
開心首演老竇
泰臣形容拍《我愛九龍城》似標尾會，因上半年幕前工作不多，5月獲開電視高層杜之克邀請演出，最開心今次角色有新突破，劇中他飾演許紹雄大仔，弟弟是敖嘉年和陳家樂，老婆是姚樂怡，仲有兩個10幾歲囡囡，「以往好多時都係做男主角好朋友角色，冇背景冇家庭，估唔到第1次做人老竇啲女就咁大個，原來我已經轉型可以做啲成熟角色，係好事嚟，可以做多啲其他嘢，發掘另一種角色嘅新鮮感。」
由於巿道低迷，泰臣去年主力做教學，未來亦會繼續，除客觀原因，還因很有滿足感，「年紀越嚟越大，做演員唔係咁容易遇到，反而舞台劇導演或者教學，我仲可以繼續做落去，每次教完班學生，課程結束時佢哋多謝我，都好似打咗支強心針咁，嚟緊2025年都好多呢啲文化工作，已經有個好大教育機構做個大型周年演出，搵我去幫手做創作。」龍師傅亦認同演藝工作不易為，「我都想做幕前工作，但真係越嚟越難做，九運旺文化嘅活動，我嚟緊都會搞一啲有關傷健共融嘅文化交流活動，同埋我係武術總會幹事，嚟緊亦會去學校幫手教詠春。」兩師兄弟仲計劃今年到大灣區發展，已開始傾洽談一些演出機會。
