頭條戲場丨《旺卡》笑住散場的可愛糖水系電影
發佈時間：08:00 2023-12-13 HKT
先恭喜Timothée Chalamet憑《旺卡》入圍金球獎「音樂/喜劇類最佳男主角」，跟Nicolas Cage及Joaquin Phoenix爭影帝。屬温暖治癒系電影，講述Tim仔飾演的Willy Wonka是一位偉大的朱古力發明家，因為媽媽的遺言，「永遠不要放棄自己的夢想。」又本住甜品能帶給人幸福，努力在已被大財團壟斷的小鎮，艱苦地爭取賣朱古力。超勵志童話配上夢幻場景，有童真但唔幼稚，內心講咗過萬次，「好得意呀。」最重要被Timothée冧足全程，用朱古力救世嘅電影都唔使深究劇情啦，全片可可愛愛，好耐未試過笑住散場。(剛上映) 撰文:廖思慧
導演揀Tim仔演Wonka，因為覺得佢「氣質非凡，感覺他像是從另一個次元來的人。」導演完全講出我心聲，基本上睇Tim仔甜笑已經好享受，仲要唱歌加跳舞，雖然唔算動聽，據知拍攝前要進行4個月聲樂指導和表演方式研討，又要不斷排舞兼記對白，Fans慮鏡下加咗幾萬分。
表白隆巴小矮人
電影有勁多大星參與，金像影后Olivia Colman、金像提名女星Sally Hawkins、艾美獎得獎男星Keegan-Michael Key、《戇豆先生》Rowan Atkinson及金球獎最佳男主角Hugh Grant等。當中以Hugh Grant飾演的綠髮橙皮膚隆巴小矮人最驚喜，基本上一出場就有笑聲，聽佢手舞足蹈唱Oompa Loompa歌，話咁快入晒腦，所有小矮人嘅配件都好得意，希望之後會出Figure啦。
電影畫面靚、景靚，連朱古力都好有心思，劇組搵嚟朱古力大師Gabriella Cugno製作數百種不同風味的朱古力，基本上演員在Wonka朱古力工廠食嘅花同葉都真係可以吞落肚。而Wonka的signature朱古力亦相當過癮，包括食完會在半空飄浮，以俄羅斯小丑的悲歡淚醃製的焦糖所製成的飄浮朱古力，及濃縮雷雨雲加上液態陽光製成的靈光一閃朱古力，食完會助你從絕望中看到一線曙光，咦，呢粒真心想買喎。
【超可愛角色海報】：
【WONKA的神奇朱古力】：
《星島頭條》新網站有更多精彩內容：http://www.stheadline.com/
