ESG唔係整容，係強身：老闆，你要面定要命？｜林一一

ESG

更新時間：14:12 2026-04-01 HKT
發佈時間：14:12 2026-04-01 HKT

前幾日去客度開會，氣氛有一種令人窒息嘅「焦慮感」。老闆揉住太陽穴，指住電腦入面行家份報告，語重心長咁講：「一一，我唔係想難為阿強，但我哋係上市公司，投資者真係會問。行家個『綠色採購比率』已經衝到70%，我哋仲喺35%徘徊，我點同Board交代？阿強，三個月內，你諗下辦法將外賣餐具全線轉做生物可分解（Biodegradable），得唔得？」

採購經理阿強面露難色，細細聲話：「老闆，我明。但轉得太急，供應商嗰邊真係搞唔掂。而家肯接單嘅都係啲蚊型廠，產能同質素都冇保證，萬一出事，斷貨都算，最驚係啲證書有水分，到時被質疑洗綠（Greenwashing），損失仲大……

老闆嘆咗口氣，拍拍阿強膊頭：「阿強，我知你難做。但市場等唔到我哋慢慢深耕。你先搵班細廠頂住個數先，等過咗呢季，我哋再慢慢執返好條供應鏈，得唔得？」

我坐喺側邊，飲咗啖凍咗嘅咖啡，心諗：呢句「等過咗呢季先執」，其實係所有企業慢性自殺嘅開場白。

顧住面子先

呢種「先攞指標，後補建設」嘅邏輯，正正係典型嘅短期主義陷阱。老闆唔係衰人，佢只係一個典型嘅「數字信徒」，以為ESG係一套可以靠「買」或者「換供應商」就即刻解決嘅插件。佢哋睇到嘅係短期嘅公關紅利同股價平穩，但睇唔到嘅係企業「韌性」（Resilience）嘅崩塌。

當你為咗追逐三個月內嘅數據增長，而強行打碎原本穩定嘅供應關係，你其實係將公司推向一個極高風險嘅「單次博弈」環境。阿強口中嗰啲「蚊型廠」同「水分證書」，就係一顆顆埋喺未來業績入面嘅定時炸彈。當企業唔願意投資時間同資源去同供應商共同研發、做技術轉型，而只係想透過更換採購對象嚟「刷數據」，呢種做法根本唔係發展，而係一種對未來生存能力嘅掠奪。

長遠嘅嘢長遠先諗

從經濟學嘅「古德哈特定律」（Goodhart's Law）嚟睇，當一個指標（綠色採購比率）變成了目標，佢就失去咗真實嘅衡量功能。而人類學入面嘅「掠奪式經濟」（Extractive Economy）更揭示咗真相：老闆唔係想喺度深耕細作，佢只係想喺任期內掠奪最多嘅「道德資本」，然後趕喺供應鏈崩潰之前，完成華麗轉身。呢種對「長期能力建設」嘅集體性遺忘，令到企業變成咗一個冇根嘅盆栽，雖然今日花開得燦爛，但只要一陣微風吹過，就會成盆跌碎。

可惜，喺中環呢個追求「即食」嘅戰場，呢種「細水長流」嘅建議往往會被視為「不切實際」。大家更習慣嘅係將「可持續發展」做成一份地產宣傳冊，外牆貼滿綠色瓷磚，入面地基漏水？唔緊要，只要我哋賣得夠快，爆喉嗰陣，我已經喺另一個更豪華嘅會所度飲緊香檳。

一啖砂糖一啖屎

過咗一排，阿強同我講佢想遞信辭職，我撳住佢，同佢講我已經同老闆磨緊，希望佢再等多陣。老闆最初好堅持，覺得我「離地」。我直接將幾單國際供應鏈醜聞嘅相片同股價圖隊到佢面前：「老闆，股價唔會因為供應鏈唔夠綠而跌，但會因為供應商產量質素出問題，導致公司出品有問題而大跌。你今日搵班細廠頂數，聽日個飯盒漏水或者溶咗，你個Brand就玩完。」老闆睇住嗰啲血淋淋嘅數據，沉默咗一陣，轉頭都係叫我畀時間佢諗下。

我知道老闆除咗驚輸，仲好想要面。所以，我補多一步：「你諗下，如果你同呢間老牌供應商搞長期研發合作，喺行內絕對係指標性消息。我哋到時仲可以爭取喺年度ESG高峰會上台演講。到時，你唔係『追數據』嘅跟風者，而係定義『供應鏈夥伴關係』嘅業界先鋒，呢個案例絕對係業內教科書級數。」

老闆聽到「上台演講」同「教科書級數」，對眼即刻亮晒。兩個月後，佢批准咗研發協議，阿強亦收返封信，眼入面團火熄而復燃。雖然老闆未必真心認同員工關心嘅價值，但起碼最終成功保持大方向一致，相信老闆最終會見到理想嘅畫面。

呢一刻，大家都喺度玩緊「可持續」嘅魔術，但真正嘅高手，係敢於喺音樂停咗之後，依然坐喺自己親手造嘅木凳上面。至於嗰班仲喺度搶緊位、仲掙扎緊要唔要「執靚個數」嘅大師？祝你哋喺草地變沙漠之前，跳得夠快啦。